Read Buku Loyera - Chichewa Mas. 51 Bible Online

Mas. 51 - Buku Loyera - Chichewa bible

Mas. 51

¹Kwa Woimbitsa Nyimbo. Salmo la Davide. Mneneri Natani anali atamdzudzula chifukwa cha kuloŵana ndi Bateseba. Mundichitire chifundo, Inu Mulungu, malinga ndi chikondi chanu chosasinthika. Mufafanize machimo anga, malinga ndi chifundo chanu chachikulu.

²Mundisambitse kwathunthu pochotsa kulakwa kwanga, mundiyeretse mtima pochotsa machimo anga.

³Zolakwa zanga ndikuzidziŵa, kuchimwa kwanga ndikukuzindikira nthaŵi zonse.

⁴Ndachimwira Inu, Inu nokha, ndachita choipa pamaso panu. Motero mwakhoza ponditchula wolakwa, simudalakwe pogamula mlandu wanga.

⁵Zoonadi, ndidabadwa mu uchimo, ndinali mu uchimo kuyambira pamene mai wanga adatenga pathupi pa ine.

⁶Ndithudi, Inu mumakonda mtima woona, choncho mundiphunzitse nzeru zanu.

⁷Mundiyeretse ndi hisope ndipo ndidzakhala woyera. Mundisambitse, ndipo ndidzayera kupambana chisanu chambee.

⁸Mundilole ndimve chimwemwe ndi chikondwerero. Ngakhale mwandiphwanyaphwanya mafupa, mundilole ndidzasangalalenso.

⁹Mufulatire machimo anga, mufafanize zoipa zanga zonse.

¹⁰Mundilengere mtima woyera, Inu Mulungu, muike mwa ine mtima watsopano ndi wokhazikika.

¹¹Musandipirikitse pamaso panu, musachotse Mzimu wanu woyera mwa ine.

¹²Mundibwezere chimwemwe cha chipulumutso chanu, mulimbitse mwa ine mtima womvera.

¹³Pamenepo ochimwa ndidzaŵaphunzitsa njira zanu, ndipo iwo adzabwerera kwa Inu.

¹⁴Mundikhululukire mlandu wanga wokhetsa magazi, Inu Mulungu, Mulungu Mpulumutsi wanga, ndipo ndidzakweza mau poimba za chipulumutso chanu.

¹⁵Ambuye, tsekulani milomo yanga, ndipo pakamwa panga padzalankhula zotamanda Inu.

¹⁶Si nsembe wamba imene Inu imakusangalatsani. Ndikadapereka nsembe yopsereza, sibwenzi Inu mutakondwera nayo.

¹⁷Nsembe imene Inu Mulungu mumailandira, ndi mtima wotswanyika. Mtima wachisoni ndi wolapa, Inu Mulungu simudzaunyoza.

¹⁸Muŵachitire zabwino anthu a ku Ziyoni, chifukwa cha kukoma mtima kwanu. Mumangenso kachiŵiri makoma a Yerusalemu.

¹⁹Pamenepo mudzakondwera ndi nsembe zoyenera, nsembe zootcha ndi zopsereza kwathunthu. Choncho adzapereka ng'ombe zamphongo pa guwa lanu lansembe.