Read Buku Loyera - Chichewa Mas. 55 Bible Online

Mas. 55 - Buku Loyera - Chichewa bible

Mas. 55

¹Kwa Woimbitsa Nyimbo. Ndakatulo ya Davide, yoimbira zipangizo zazingwe. Inu Mulungu, tcherani khutu kuti mumve pemphero langa, musabisale pamene ndikukupembani.

²Mundimvere, ndipo mundiyankhe. Mtima wanga suli m'malo chifukwa cha mavuto anga.

³Ndikuda nkhaŵa chifukwa adani anga akundifuulira, anthu oipa akundipsinja. Akundivutitsa kwambiri, akundikwiyira kosalekeza.

⁴Mtima wanga ukumva ululu woopsa, zoopsa za imfa zandigwera.

⁵Mantha andifikira, ndipo ndikunjenjemera, mantha aakulu andigwira.

⁶Ndipo ndimati, “Ndikadakhala ndi mapiko onga a njiŵa, bwenzi nditauluka kupita kutali kukapuma.

⁷Inde, ndikadathaŵira kutali ndi kukakhala ku chipululu.

⁸“Ndikadafulumira kupeza pobisalira mphepo yaukali yamkunthoyi.”

⁹Inu Ambuye, onongani zolinga za adani anga, musokoneze upo wao. Pakuti ndikuwona anthu akuchita chiwawa ndi nkhondo mumzindamo.

¹⁰Usana ndi usiku iwo akuuzungulira pa makoma ake, mumzindamo muli chiwawa ndi nkhondo.

¹¹M'menemo muli chiwonongeko chokhachokha. M'misika yake muli zopanikizana ndi zonyenga.

¹²Akadakhala mdani wanga wondinyozayo, ndikadatha kupirira. Akadakhala mdani wanga wondichita chipongweyo, ndikadangobisala basi.

¹³Koma iweyo mnzanga, mnzanga woyenda naye, bwenzi langa wozoloŵerana naye, ndi amene ukuchita zimenezi.

¹⁴Tinkakambirana nkhani zokoma tili aŵiri, tinkapembedza limodzi m'Nyumba ya Mulungu.

¹⁵Inu Mulungu, mulole kuti imfa iŵagwere adani anga, atsikire ku manda akadali moyo, pakuti zoipa zili tho m'mitima ndi m'nyumba zao.

¹⁶Koma ine ndikupempha Chauta, ndipo Iye adzandithandiza.

¹⁷Madzulo, m'maŵa ndi masana ndikudandaula ndi kulira, ndipo Iye adzamva mau anga.

¹⁸Adzapulumutsa moyo wanga pa nkhondo imene ndikumenya, pakuti anthu ambiri akukangana nane.

¹⁹Mulungu, amene akukhala pa mpando waufumu kuyambira kalekale, adzandimenyera nkhondo, adzaŵatsitsa adani anga chifukwa safuna kusintha khalidwe lao loipa, ndipo saopa Iye.

²⁰Mnzanga adatambasula dzanja lake kuti amenye abwenzi ake, adaphwanya chipangano chake.

²¹Mau ake anali osalala kupambana batala, komabe mumtima mwake munali zankhondo. Mau ake anali ofeŵa kupambana mafuta, komabe anali ndi malupanga osololasolola.

²²Tula kwa Chauta nkhaŵa zako, ndipo Iye adzakuchirikiza. Sadzalola konse kuti wolungama wake agwedezeke.

²³Koma Inu Mulungu mudzaŵaponya adani anga m'dzenje lozama lachiwonongeko. Anthu okhetsa magazi ndi onyenga sadzafika ngakhale theka la masiku ao. Koma ine ndidzadalira Inu.