Read Buku Loyera - Chichewa Mas. 56 Bible Online

Mas. 56 - Buku Loyera - Chichewa bible

Mas. 56

¹Kwa Woimbitsa Nyimbo. Kutsata maimbidwe a nyimbo yoti: Njiŵa yatera m'mitengo ya thundu yakutali. Salmo la Davide la mtundu wa Mikitamu. Afilisti anali atamugwira ku Gati. Inu Mulungu, mundichitire chifundo, pakuti anthu akundizunza. Adani akundithira nkhondo ndi kundipsinja tsiku lonse.

²Adani akundizunza tsiku lonse, pali ambiri amene akumenyana nane monyada.

³Pamene ndichita mantha ndimadalira Inu.

⁴Ndimatamanda Mulungu chifukwa cha zimene wandilonjeza. Ndimakhulupirira Mulungu mopanda mantha. Kodi munthu angandichite chiyani?

⁵Tsiku lonse adaniwo amafunafuna kulepheretsa zolinga zanga. Zonse zimene amaganiza ndi zoti andichite zoipa.

⁶Amasonkhana okhaokha namabisalira, amalonda mayendedwe anga, amafuna kundipha.

⁷Muŵalange chifukwa cha zoipa zao. Inu Mulungu, muŵakwiyire anthuwo ndi kuŵaononga.

⁸Inu mwaona kupiripita kwanga, mudziŵa kuchuluka kwa misozi yanga. Kodi zonsezi sizidalembedwe m'buku lanu?

⁹Tsono adani anga adzabwezedwa m'mbuyo pa tsiku lomwe ndidzaitana Mulungu. Ndikudziŵa kuti Mulungu ali pa mbali yanga.

¹⁰Ndimatamanda Mulungu chifukwa cha mau ake. Ndimatamanda Chauta chifukwa cha zimene wandilonjeza.

¹¹Ndimadalira Mulungu, sindidzachita mantha konse. Kodi munthu angandichite chiyani?

¹²Ndiyenera kuchita zimene ndidalumbira kwa Inu Mulungu. Ndidzapereka kwa Inu nsembe zothokozera.

¹³Pakuti mwalanditsa moyo wanga ku imfa. Inde mwandichirikiza mapazi kuti ndisagwe, kuti motero ndiziyenda pamaso pa Mulungu m'kuŵala kwa amoyo.