Read Buku Loyera - Chichewa Mas. 58 Bible Online

Mas. 58 - Buku Loyera - Chichewa bible

Mas. 58

¹Kwa Woimbitsa Nyimbo. Kutsata maimbidwe a nyimbo yoti: Musaononge. Salmo la Davide la mtundu wa Mikitamu. Kodi mumagamuladi molungama, inu akuluakulu oweruza? Kodi mumaweruzadi anthu mwachilungamo?

²Iyai, mitima yanu imangolingalira zoipa, kuweruza kwanu kosalungama kumadzetsa chiwawa.

³Anthu oipa ndi osokera kuyambira ali m'mimba mwa mai ao, anthu amabodza ndi otayika kuyambira tsiku la kubadwa kwao.

⁴Ali ndi ululu wonga wa njoka, ali ngati mphiri yogontha, imene yatseka makutu ake,

⁵kotero kuti siimva liwu loitana la kamatsenga, ngakhale akhale wochenjera chotani.

⁶Inu Mulungu, gululani mano a m'kamwa mwao, phwanyani nsagwada za mikangoyi, Inu Chauta.

⁷Azimirire ngati madzi opita, mivi yao iŵafotere m'manja ngati udzu.

⁸Akhale ngati nkhonodambe imene imazimirira poyenda, ngati mtayo wosaona dzuŵa.

⁹Miphika yanu isanagwire moto wa nkhuni zaminga, zingakhale zaziŵisi kapena zoyaka, Mulungu aziseseretu nkuzichotsa.

¹⁰Munthu wangwiro adzakondwera poona kulipsirako. Adzasamba mapazi ake m'magazi a anthu oipawo.

¹¹Motero anthu adzati, “Zoona, olungama amalandiradi mphotho. Alipodi Mulungu amene amaweruza pa dziko lapansi.”