Read Buku Loyera - Chichewa Mas. 60 Bible Online

Mas. 60 - Buku Loyera - Chichewa bible

Mas. 60

¹Kwa Woimbitsa Nyimbo. Kutsata maimbidwe a nyimbo yoti: Kakombo wa Chipangano. Salmo la Davide la mtundu wa Mikitamu, lophunzitsira. Davide anali atathira nkhondo anthu a ku Aramu Naharimu ndi a ku Aramu Zoba. Pamenepo nkuti Yowabu atadzaononga Aedomu zikwi khumi ndi ziŵiri ku Chigwa cha Mohere. Inu Mulungu mwatitaya ife, mwatiwonongera otiteteza. Mwatikwiyira, tibwezeni mwakale.

²Inu mwagwedeza dziko ndi chivomezi, Inu mwaling'amba. Konzani ming'alu yake, pakuti likugwedezeka koopsa,

³Inu mwalola anthu anu kuti aone mavuto aakulu. Mwatipatsa vinyo wachilango kuti timwe, ndipo tikudzandira naye.

⁴Komabe Inu mwatikwezera mbendera ife amene timakuwopani, kuti tisonkhanireko pothaŵa uta wankhondo.

⁵Tipambanitseni pa nkhondo ndi dzanja lanu lamanja, mutiyankhe kuti ife, okondedwa anu, tipulumuke.

⁶Mulungu ali ku malo ake oyera, walonjeza kuti, “Ndidzakugaŵirani dziko la Sekemu mokondwa, ndidzakulemberani malire m'chigwa cha Sukoti.

⁷“Giliyadi ndi wanga, Manase ndi wanga. Efuremu ali ngati chisoti changa chodzitetezera, Yuda ali ngati ndodo yanga yaufumu.

⁸“Mowabu adzakhala ngati mbale yosambiramo ine. Edomu adzakhala poponda nsapato zanga. Ndidzafuula mokondwa nditagonjetsa Filistiya.”

⁹Ndani adzandifikitse ku mzinda wamalinga? Ndani adzanditsogolere ku Edomu?

¹⁰Si wina ai koma ndinu Mulungu amene mwatitaya, ndinu Mulungu amene mwaleka kuperekeza ankhondo athu.

¹¹Tithandizeni kulimbana ndi adani athuwo, pakuti chithandizo cha munthu nchopandapake.

¹²Mulungu akakhala nafe, tidzamenya nkhondo molimba mtima, pakuti ndiye amene adzapondereza adani athu.