Read Buku Loyera - Chichewa Mas. 63 Bible Online

Mas. 63 - Buku Loyera - Chichewa bible

Mas. 63

¹Salmo la Davide, pamene anali m'Chipululu cha Yuda. Inu Mulungu, ndinu Mulungu wanga, ndimakufunafunani. Mtima wanga ukumva ludzu lofuna Inu, thupi langa likulakalaka Inu ngati dziko louma, loguga ndi lopanda madzi.

²Ndikukhumbira kukuwonani m'malo anu oyera ndi kuwona mphamvu zanu ndi ulemerero wanu.

³Ndidzakutamandani chifukwa chikondi chanu nchabwino kupambana moyo.

⁴Choncho ndidzakutamandani masiku onse a moyo wanga. Ndidzakweza manja anga kwa Inu mopemphera.

⁵Mudzandikhutitsa ndi zonona, ndipo ndidzakutamandani ndi mau osangalala.

⁶Ndikagona pabedi panga ndimalingalira za Inu, usiku wonse ndimasinkhasinkha za Inu.

⁷Inu mwakhala chithandizo changa, motero ndikuimba ndi chimwemwe pansi pa mapiko anu.

⁸Mtima wanga ukukangamira Inu, dzanja lanu lamanja likundichirikiza.

⁹Koma anthu amene amayesayesa kuwononga moyo wanga, adzatsikira ku dziko la anthu akufa.

¹⁰Iwo adzaperekedwa kuti akaphedwe ku nkhondo, motero adzasanduka chakudya cha nkhandwe.

¹¹Koma mfumu idzakondwera mwa Mulungu. Onse olumbirira Iye, adzamtamanda, koma pakamwa pa anthu abodza padzatsekedwa.