Read Buku Loyera - Chichewa Mas. 66 Bible Online

Mas. 66 - Buku Loyera - Chichewa bible

Mas. 66

¹Kwa Woimbitsa Nyimbo. Nyimbo. Salmo. Tamandani Mulungu ndi chimwemwe mokweza mau, inu anthu onse a pa dziko lapansi.

²Imbani nyimbo zoyamika dzina lake laulemerero, mumtamande mwaulemu.

³Muuzeni Mulungu kuti, “Ntchito zanu nzodabwitsa kwambiri. Mphamvu zanu nzazikulu, kotero kuti adani anu amakuŵeramirani moopa.

⁴Anthu onse a pa dziko lapansi amakupembedzani, amaimba nyimbo zotamanda Inu, amaimba nyimbo zotamanda dzina lanu.”

⁵Bwerani mudzaone zimene Mulungu wachita, ntchito zake nzodabwitsa pakati pa anthu.

⁶Adasandutsa nyanja kuti ikhale nthaka youma. Anthu adaoloka mtsinje uja poyenda pansi. Nchifukwa chake timukondwerere Iye.

⁷Iye amalamula ndi mphamvu zake mpaka muyaya, maso ake amalonda mitundu ina ya anthu. Anthu oukira asadzikweze.

⁸Lemekezani Mulungu wathu, inu mitundu ya anthunu, mau omtamanda Iye amveke.

⁹Iye watchinjiriza moyo wathu, sadalole kuti mapazi athu aterereke.

¹⁰Inu Mulungu, mwatiyesa, mwatiyeretsa monga m'mene amayeretsera siliva.

¹¹Inu mudatiloŵetsa mu ukonde wa adani, mudatisenzetsa katundu wolemera pamsana pathu.

¹²Inu mudalola kuti adani atikwere pa mutu, tidaloŵa m'moto ndiponso m'madzi, komabe Inu mwatifikitsa ku malo opulumukirako.

¹³Ndidzabwera ku Nyumba yanu ndi nsembe zopsereza, ndidzachitadi zimene ndidazilumbira kwa Inu,

¹⁴zimene ndidalankhula ndi pakamwa panga, ndiponso zimene ndidalonjeza pamene ndinali pa mavuto.

¹⁵Ndidzapereka kwa Inu nsembe zopsereza za nyama zonenepa, utsi wa nsembe za nkhosa zamphongo udzafika kwa Inu. Ndidzaperekanso ngati nsembe ng'ombe zamphongo ndi mbuzi.

¹⁶Bwerani mudzamve, inu nonse amene opembedza Mulungu, ndidzakusimbireni zimene Iye wandichitira.

¹⁷Ndidafuula kwa Iye, ndipo ndidamtamanda ndi pakamwa panga.

¹⁸Ndikadazindikira choipa chilichonse mumtima mwanga ndi kuchibisa, Ambuye sakadandimvera.

¹⁹Koma zoonadi, Mulungu wandimvera, wasamala mau a pemphero langa.

²⁰Mulungu atamandike chifukwa sadakane pemphero langa, sadachotse chikondi chake chosasinthika kwa Ine.