Read Buku Loyera - Chichewa Mas. 69 Bible Online

Mas. 69 - Buku Loyera - Chichewa bible

Mas. 69

¹Kwa Woimbitsa Nyimbo. Kutsata maimbidwe a nyimbo yoti: Akakombo. Salmo la Davide. Inu Mulungu, pulumutseni, pakuti madzi ayesa m'khosi.

²Ndamira m'thope lozama m'mene mulibe popondapo polimba. Ndaloŵa m'madzi ozama, ndipo mafunde andimiza.

³Ndafooka ndi kulira kwanga, kum'mero kwanga kwauma. M'maso mwada pamene ndikuyembekezera Mulungu wanga.

⁴Anthu odana nane popanda chifukwa ndi ochuluka kupambana tsitsi la kumutu kwanga. Ndi amphamvu anthu ongofuna kundiwononga, ndi kundineneza ndi mabodza ao. Kodi ndiyenera kubweza zimene sindinabe?

⁵Inu Mulungu, mumadziŵa kupusa kwanga, zolakwa zanga sizili zobisika pamaso panu.

⁶Inu Ambuye, Chauta Wamphamvuzonse, musalole kuti ndiŵachititse manyazi anthu okhulupirira Inu. Inu Mulungu wa Israele, musalole kuti anthu okufunafunani anyozeke chifukwa cha ine.

⁷Pakuti ndanyozedwa, nkhope yanga yagwidwa ndi manyazi chifukwa cha Inu.

⁸Kwa abale anga ndasanduka mlendo, kwa ana a mai wanga ndili ngati wakudza.

⁹Changu chochitira Nyumba yanu chandiphetsa, chipongwe cha anthu okunyozani chandigwera.

¹⁰Pamene ndidadzilanga posala zakudya, anthu adandinyoza.

¹¹Pamene ndidavala chiguduli kuwonetsa chisoni, ndidasanduka chinthu choŵaseketsa.

¹²Anthu okhala pa chipata amandinena, ndipo zidakwa zimandiimba nyimbo.

¹³Koma ine ndimapemphera kwa Inu Chauta. Mundiyankhe pa nthaŵi yabwino, Inu Mulungu, chifukwa cha kukula kwa chikondi chanu chosasinthika, ndi chithandizo chanu chokhulupirika.

¹⁴Pulumutseni kuti ndisamire m'matope, landitseni kwa adani anga ndi ku madzi ozama.

¹⁵Musalole kuti chigumula chindikokolole, kapena kuti nyanja yakuya indimize. Musalole kuti manda atseke kukamwa atandimeza.

¹⁶Mundiyankhe, Inu Chauta, pakuti chikondi chanu chosasinthika nchabwino. Munditchere khutu chifukwa cha chifundo chanu chachikulu.

¹⁷Musandibisire ine mtumiki wanu nkhope yanu, fulumirani kundithandiza, pakuti ndili pa zovuta.

¹⁸Senderani pafupi, mundiwombole, mundipulumutse kwa adani anga.

¹⁹Inu mumadziŵa m'mene anthu amandinyozera, m'mene amandichititsira manyazi ndi kundichotsera ulemu. Adani anga onse mumaŵadziŵa.

²⁰Mtima wanga wasweka chifukwa cha zipongwe, ndataya mtima kotheratu. Ndidafunafuna ena ondichitira chifundo, koma panalibe ndi mmodzi yemwe. Ndidafunafunanso ena ondisangalatsa, koma sindidampeze ndi mmodzi yemwe.

²¹ Adandipatsa ulembe kuti ndidye, ndipo nditamva ludzu, adandipatsa vinyo wosasa kuti ndimwe.

²² Zakudya zao zisanduke msampha. Akodwe ndi maphwando a nsembe zao.

²³Maso ao achite chidima kuti asathe kupenya, ziwuno zao zizinjenjemera kosalekeza.

²⁴Muŵagwetsere ukali wanu, mkwiyo wanu woyaka moto uŵagwire.

²⁵ Zithando zao zisanduke zopanda anthu, m'mahema mwao musatsale munthu ndi mmodzi yemwe.

²⁶Iwo amazunza amene Inu mwamkantha, ndipo amene Inu mwamupweteka, iwo amaonjezera kumuvutitsa.

²⁷Muŵalange pa cholakwa chao chilichonse, musagamule kuti alibe mlandu.

²⁸ Muŵafafanize m'buku la amoyo, asalembedwe pamodzi ndi anthu anu.

²⁹Koma ine ndazunzika ndipo ndikumva kuŵaŵa. Nyamuleni Inu Mulungu, kuti ndipulumuke.

³⁰Ndidzatamanda dzina la Mulungu pomuimbira nyimbo, ndidzalalika ukulu wake pomuthokoza.

³¹Zimenezi zidzakondwetsa Chauta kupambana nsembe, ngakhale nsembe ya ng'ombe yamphongo.

³²Ozunzika aone zimenezo ndipo asangalale, inu amene mumafunafuna Mulungu, mulimbenso mtima.

³³Paja Chauta amamvera anthu osoŵa, sanyoza anthu ake omangidwa ndi unyolo.

³⁴Kumwamba ndi pansi pano, nyanja ndi zonse zoyenda m'menemo zitamande Iye.

³⁵Mulungu adzapulumutsa Ziyoni, ndipo adzamanganso mizinda ya Yuda. Anthu ake adzakhala kumeneko, ndipo lidzakhala dziko lao.

³⁶Ana a atumiki ake nawonso adzalilandira kuti likhale lao, ndipo okonda Mulungu adzakhala m'menemo.