Read Buku Loyera - Chichewa Mas. 7 Bible Online

Mas. 7 - Buku Loyera - Chichewa bible

Mas. 7

¹Salmo la Davide, la mtundu wa Sigayoni. Adaimbira Chauta ponena za Kusi Mbenjamini. Chauta, Mulungu wanga, ndikuthaŵira kwa Inu. Mundilanditse kwa onse ondithamangitsa. Mundipulumutse,

²kuti iwo anganding'ambe ngati mkango, ndi kundikadzula popanda wina wondipulumutsa.

³Chauta Mulungu wanga, ngati ndachita izi: kumchimwira munthu aliyense,

⁴kubwezera choipa bwenzi langa, kapena kumulanda zinthu mdani wanga popanda chifukwa,

⁵mdaniyo andithamangitse ndi kundigwira, andipondereze pansi ndi kundipha, andisiye ndili thasa m'fumbi.

⁶Nyamukani, Inu Chauta, muli okwiya, mulimbane ndi adani anga aukali. Dzambatukani, Inu Mulungu wanga, amene mwalamula kuti chilungamo chichitike.

⁷Musonkhanitse anthu a mitundu yonse pafupi ndi Inu, ndipo muŵaweruze mutakhala pa mpando wanu kumwamba.

⁸Chauta amagamula milandu ya anthu. Tsono thetsani mlandu, Inu Chauta, moyenera, popeza kuti ine sindidalakwe konse.

⁹Thetsani ntchito zoipa za anthu ochimwa, koma anthu ochita zabwino muŵabwezere zokoma. Inu ndinu amene mumayesa maganizo ndi mitima yomwe, Inu ndinu Mulungu wolungama.

¹⁰Mulungu ndiye chishango changa, amapulumutsa anthu olungama mtima.

¹¹Mulungu ndiye muweruzi wolungama, amalanga anthu oipa nthaŵi zonse.

¹²Ngati munthu salapa, Mulungu adzanola lupanga lake, adzakunga ndi kukoka uta wake.

¹³Wakonza zida zake zoopsa, waika mivi yamoto ku uta wake.

¹⁴Zoonadi, munthu woipa amalingalira zoipa zokhazokha nthaŵi zonse, ntchito yake ndi kunyenga ndi kuvutitsa anthu ena basi.

¹⁵Amakumba mbuna kuti ikhale yozama, koma amagwamo ndiye yemwe.

¹⁶Choipa chitsata mwini, chiwawa chimabwerera pa mwini wake.

¹⁷Ine ndidzathokoza Chauta chifukwa cha kulungama kwake, ndidzaimba nyimbo zotamanda dzina la Chauta, Wopambanazonse uja.