Read Buku Loyera - Chichewa Mas. 72 Bible Online

Mas. 72 - Buku Loyera - Chichewa bible

Mas. 72

¹Salmo la Solomoni. Inu Mulungu, patsaniko mfumu nzeru zoweruzira, patsaniko mwana wa mfumu mtima wokonda chilungamo.

²Motero mfumuyo idzaweruza anthu anu molungama ndiponso anthu anu osauka mosakondera.

³Mapiri adzabweretsa madalitso kwa anthu, magomo adzadzetsa mphotho ya chilungamo.

⁴Mfumu idzateteza anthu osauka, idzapulumutsa anthu osoŵa, koma idzaononga anthu ozunza anzao.

⁵Idzakhala moyo pa mibadwo yonse, nthaŵi zonse pamene dzuŵa ndi mwezi zikuŵala mu mlengalenga.

⁶Idzakhala madalitso ngati mvula yogwa pa minda ngati mvula yowaza pa nthaka!

⁷Pa masiku ake chilungamo chidzakula, mtendere udzachuluka, mpaka mwezi utaleka kuŵala!

⁸Idzakhala ikulamulira kuchokera ku nyanja ina mpaka ku nyanja ina, kuchokeranso ku Mtsinje[2] mpaka ku mathero a dziko.

⁹Amaliwongo akuchipululu adzaiŵeramira, adani ake adzadya fumbi.

¹⁰Mafumu a ku Tarisisi ndi akuzilumba adzaipatsa mitulo, mafumu a ku Sheba ndi a ku Seba[3] adzabwera ndi mphatso.

¹¹Mafumu onse adzaigwadira ndipo mitundu yonse ya anthu idzaitumikira.

¹²Ndithu iyo idzalanditsa anthu osoŵa amene amaiitana, idzapulumutsa anthu osauka ndiponso opanda woŵathandiza.

¹³Idzamvera chisoni anthu ofooka ndi osoŵa, ndipo idzapulumutsa moyo wa anthu aumphaŵi.

¹⁴Idzaombola moyo wao kwa anthu oŵapsinja ndi kwa oŵachita zankhanza, pakuti magazi ao ndi amtengowapatali pamaso pake.

¹⁵Ikhale ndi moyo wautali! Golide wa ku Sheba apatsidwe kwa mfumuyo. Anthu aipempherere nthaŵi zonse, aipemphere madalitso kosalekeza.

¹⁶M'dziko mukhale chakudya chambiri, pamwambanso pa mapiri pakhale dzinthu. Zipatso zake zichuluke ngati za ku Lebanoni, anthu ake achuluke m'mizindamo ngati udzu wakuthengo.

¹⁷Dzina lake lisaiŵalike konse, mbiri yake ikhalepobe monga momwe limakhalira dzuŵa. Anthu alandire madalitso chifukwa cha iyo, a mitundu yonse aitche yodala.

¹⁸Atamandike Chauta, Mulungu wa Israele. Iye yekha ndiye amene amachita zinthu zodabwitsa.

¹⁹Dzina lake laulemerero litamandike mpaka muyaya. Ulemerero wake udzaze dziko lonse lapansi. Inde momwemo. Inde momwemo.

²⁰Ano ndiwo mathero a mapemphero a Davide, mwana wa Yese.