Read Buku Loyera - Chichewa Mas. 73 Bible Online

Mas. 73 - Buku Loyera - Chichewa bible

Mas. 73

¹Salmo la Asafu. Zoonadi, Mulungu ndi wabwino kwa olungama, kwa anthu oyera mtima.

²Koma ine ndinali pafupi kuphunthwa, mapazi anga anali pafupi kuterereka.

³Pakuti ndinkachita nsanje ndi anthu odzikuza, pamene ndidaona anthu oipa akulemera.

⁴Iwowo samva kupweteka konse. Matupi ao ndi onenepa ndi athanzi.

⁵Saona mavuto monga anthu ena, sazunzika ngati anzao.

⁶Nchifukwa chake amavala kunyada ngati mkanda wam'khosi. Amavala nkhanza ngati malaya.

⁷Maso ao ndi otupa ndi kunenepa. Mitima yao ndi yodzaza ndi maganizo ofuna kuchita zoipa.

⁸Amanyodola ndi kumalankhula zoipa, amadzikuza ndi kumaopseza ena kuti, “Tikupsinjani.”

⁹Pakamwa pao pamalankhula monyoza Mulungu kumwamba, ndipo lilime lao ndi losamangika pa dziko lapansi.

¹⁰Nchifukwa chake ngakhale anthu a Mulungu amabwera kwa iwo, ndipo amakhuta zonena zao ngati madzi akumwa.

¹¹Amati, “Kodi Mulungu angadziŵe bwanji? Kodi Wopambanazonseyo angadziŵe kanthu kalikonse?”

¹²Onani, umu ndimo m'mene aliri anthu oipa. Nthaŵi zonse ali pabwino, ndipo amangolemera kosalekeza.

¹³Ine ndasunga mtima wanga woyera, ndasamba m'manja kuwonetsa kuti ndine wosalakwa, koma zonsezi popanda phindu konse.

¹⁴Pakuti ndapeza mavuto tsiku lonse, ndipo ndalangidwa m'maŵa mulimonse.

¹⁵Ndikadati, “Ndilankhula monga amachitira iwowo,” ndikadakhala wosakhulupirika kwa zidzukulu zanu,

¹⁶Koma pamene ndidalingalira zimenezi kuti ndizimvetse bwino, zidandiwonekera ngati nkhani yovuta,

¹⁷mpaka nditakaloŵa m'malo opatulika a Mulungu, apo mpamene ndidaona mathero ake a anthuwo.

¹⁸Zoonadi, Inu mumapondetsa anthu oipa pa malo oterera. Mumaŵagwetsa mpaka aonongeke.

¹⁹Adzangoferatu ndi mantha, ndi kuwonongeka pa kamphindi kochepa.

²⁰Inu Ambuye, pamene mudzadzuka mudzaŵanyoza kotheratu, monga momwe munthu amanyozera maloto atadzuka m'maŵa.

²¹Pamene paja ndinkavutika ndi maganizo, ndi kumamva cholasa mumtimamu,

²²ndinali wopusa wosamvetsa kanthu, ndinali ngati chilombo kwa Inu.

²³Koma chonsecho ndili ndi Inu nthaŵi zonse. Inu mumandigwira dzanja lamanja.

²⁴Mumandiwongolera ndi malangizo anu, pambuyo pake mudzandilandira ku ulemerero.

²⁵Nanga ndili ndi yani kumwamba kupatula Inu? Pansi pano palibe kanthu kena kamene ndimafuna, koma Inu nokha.

²⁶Thupi langa ndi mtima wanga zingafooke chotani, Mulungu ndiye mphamvu za mtima wanga ndiyenso wondigaŵira madalitso mpaka muyaya.

²⁷Onse amene ali kutali ndi Inu adzaonongeka, Inu mumaŵaononga amene ali osakhulupirika kwa Inu.

²⁸Koma ine kukhala pafupi ndi Mulungu kumandikomera. Ndatsimikiza zoti Ambuye ndiwo kothaŵira kwanga ndipo ndidzalalika ntchito zao zonse.