Read Buku Loyera - Chichewa Mas. 74 Bible Online

Mas. 74 - Buku Loyera - Chichewa bible

Mas. 74

¹Ndakatulo ya Asafu. Inu Mulungu, chifukwa chiyani mukutitaya mpaka muyaya? Chifukwa chiyani mkwiyo wanu ukutukutirira nkhosa za busa lanu ngati moto?

²Kumbukirani mpingo wanu umene mudaupatula kuyambira kale, mtundu umene Inu mudauwombola kuti ukhale wanuwanu. Kumbukirani phiri la Ziyoni kumene Inu mudadzakhala.

³Dzayendereni mabwinja oonongeka kwathunthuŵa. Adani aononga zinthu zonse za m'Nyumba yanu.

⁴Adani anu abangula m'malo anu opatulika, adaikamo mbendera zao kusonyeza kuti agonjetsa.

⁵Adadulamo zonse, monga momwe anthu amadulira mitengo m'nkhalango.

⁶Pambuyo pake, ndi nsompho ndi nyundo, adakadzula zosemasema zonse.

⁷Nyumba yanu adaitentha, malo amene Inu mumakhalako adaŵaipitsa poŵagwetsera pansi.

⁸Mumtima mwao ankati, “Tiyeni tiŵagonjetse kotheratu.” Adatentha malo opatulika onse a Mulungu m'dzikomo.

⁹Zizindikiro zonse za fuko lathu zaonongeka, kulibenso mneneri ndi mmodzi yemwe, palibe ndi mmodzi yemwe pakati pathu amene akudziŵa nthaŵi yodzatha zimenezi.

¹⁰Inu Mulungu, adani athuŵa adzanyodolabe mpaka liti? Amaliwongowo adzanyozabe dzina lanu mpaka muyaya?

¹¹Chifukwa chiyani mukubisa dzanja lanu lotithandiza? Bwanji dzanja lanu lamanja likungokhala pachifuwa panu?

¹²Komabe Inu Mulungu, ndinu mfumu yanga kuyambira kalekale. Ndinu amene mumagwira ntchito yopulumutsa pa dziko lonse lapansi.

¹³ Mudagaŵa Nyanja Yofiira ndi mphamvu zanu. Mudaphwanya mitu ya zilombo zam'madzi.

¹⁴ Mudatswanya mitu ya Leviyatani, chilombo cham'madzi chija, nkuitaya kuti ikhale chakudya cha zilombo zam'chipululu.

¹⁵Mudatumphutsa akasupe ndi mifuleni, mudaumitsa mitsinje imene siiphwa.

¹⁶Mudalenga usana ndi usiku. Mudaika mwezi ndi dzuŵa m'malo mwake.

¹⁷Mudalemba malire a dziko lapansi, mudakhazikitsa chilimwe ndi dzinja.

¹⁸Kumbukirani, Inu Chauta, kuti adani amakunyodolani, kuti anthu achipongwe amanyoza dzina lanu.

¹⁹Musati mupereke moyo wa nkhunda yanu Israele ku zilombo zakuthengo. Musaiŵale mpaka muyaya moyo wa anthu anu osauka.

²⁰Kumbukirani chipangano chanu, pakuti malo obisika am'dziko asanduka mochitira zankhanza zambirimbiri.

²¹Musalole kuti anthu oponderezedwa achite manyazi. Osauka ndi osoŵa akutamandeni.

²²Dzambatukani, Inu Mulungu, tiyeni mudziteteze pa mlandu wanuwo, kumbukirani kuti anthu amwano amakunyodolani tsiku lonse.

²³Musalekerere chiwawa cha amaliwongo anu, phokoso la adani anu limene likungokulirakulira nthaŵi zonse.