Read Buku Loyera - Chichewa Mas. 76 Bible Online

Mas. 76 - Buku Loyera - Chichewa bible

Mas. 76

¹Kwa Woimbitsa Nyimbo. Salmo la Asafu loimbira zipangizo zazingwe. Mulungu ndi wodziŵika m'dziko la Yuda, dzina lake ndi lolemekezeka mu Israele.

²Hema lake adalimanga ku Yerusalemu. Malo ake okhalamo ali kumeneko ku Ziyoni.

³Kumeneko adathyola mivi youluzika, zishango, malupanga ndi zida zonse zankhondo za adani ake.

⁴Inu Mulungu, mukuwonetsa ulemerero ndi mphamvu kupambana mapiri a zofunkha.

⁵Mudalanda zofunkha za anthu olimba mtima, mudaŵagonetsa tulo tofa nato, ankhondo onse sankatha kuchita kanthu ndi manja ao.

⁶Pamene mudaŵaopsa, Inu Mulungu wa Yakobe, onse okwera pa akavalo ndi akavalo ao omwe adagwa nangoti kakasi.

⁷Zoonadi, Inu ndinu woopsa. Angathe kuima pamaso panu ndani pamene mkwiyo wanu wayaka?

⁸Chiweruzo chanu mudachilengeza kumwamba, anthu a pa dziko lapansi adaopa nakhala chete,

⁹pamene Inu Mulungu mudaimirira kuti muweruze anthu, ndi kupulumutsa opsinjidwa onse a pa dziko lapansi.

¹⁰Zoonadi, mkwiyo wa anthu umabweretsa ulemu kwa Inu, opulumuka ku mkwiyowo mumaŵasunga pafupi ndi Inu.

¹¹Lumbirani kwa Chauta, Mulungu wanu, ndipo muchitedi zimene mwalumbirazo. Onse omzungulira abwere ndi mphatso kwa Iye amene ayenera kumuwopa,

¹²ndiye amene amathetsa mphamvu akalonga ndipo amaopsa mafumu a pa dziko lapansi.