Read Buku Loyera - Chichewa Mas. 79 Bible Online

Mas. 79 - Buku Loyera - Chichewa bible

Mas. 79

¹Salmo la Asafu. Inu Mulungu, anthu akunja aloŵerera m'dziko la anthu anu, aipitsa Nyumba yanu yoyera. Asandutsa Yerusalemu bwinja.

²Ataya mitembo ya atumiki anu kwa mbalame zamumlengalenga, kuti ikhale chakudya chake, ataya matupi a anthu anu oyera mtima kwa zilombo zakuthengo.

³Akhetsa magazi ao ngati madzi, ponse pozungulira Yerusalemu, ndipo palibe woti nkuika maliro ao.

⁴Ife tasanduka chinthu chonyozeka kwa anzathu, anthu a mitundu ina amatinyodola ndi kutiseka.

⁵Mpaka liti, Inu Chauta? Kodi mudzakhalabe wokwiya mpaka muyaya? Kodi nsanje yanu idzayakabe ngati moto?

⁶Gwetsani ukali wanu pa mitundu ya anthu osakudziŵani, ndiponso pa maufumu osatama dzina lanu mopemba.

⁷Pakuti ameza anthu a Yakobe, ndipo dziko lao alisandutsa bwinja.

⁸Musatilange ife chifukwa cha machimo a makolo athu. Mutichitire chifundo msanga, chifukwa tatsitsidwa kwambiri.

⁹Tithandizeni, Inu Mulungu Mpulumutsi wathu, kuti dzina lanu likhale ndi ulemerero. Tipulumutseni, ndipo mutikhululukire zochimwa zathu, kuti dzina lanu lilemekezeke.

¹⁰Chifukwa chiyani anthu akunja akuti, “Kodi Mulungu wao ali kuti?” Mulole kuti tiwone Inu mukulipsira mitundu ina ya anthu, chifukwa chokhetsa magazi a atumiki anu.

¹¹Mumve kubuula kwa anthu am'ndende, muŵasunge ndi mphamvu zanu zazikulu anthu oyenera kuphedwa.

¹²Inu Ambuye, kunyoza kuja kumene anthu a mitundu ina adakunyozani, muŵabwezere kasanunkaŵiri.

¹³Pamenepo ife anthu anu, nkhosa za pa busa lanu, tidzakuthokozani mpaka muyaya, tidzakutamandani m'mibadwo yonse.