Read Buku Loyera - Chichewa Mas. 80 Bible Online

Mas. 80 - Buku Loyera - Chichewa bible

Mas. 80

¹Kwa Woimbitsa Nyimbo. Kutsata maimbidwe a nyimbo yoti: Akakombo a Chipangano. Salmo la Asafu. Imvani, Inu Mbusa wa Israele, Inu amene mumatsogolera anthu a Yosefe ngati gulu la nkhosa. Inu amene mumakhala pa akerubi ngati pa mpando wanu wachifumu,

²dziwonetseni kwa mafuko a Efuremu ndi Benjamini ndi Manase. Onetsani mphamvu zanu, ndipo mubwere kudzatipulumutsa.

³Inu Mulungu, tibwezereni mwakale, mutiwonetse nkhope yanu yokondwa, ndipo ife tidzapulumuka.

⁴Inu Chauta, Mulungu Wamphamvuzonse, mudzakwiyira mapemphero a anthu anu mpaka liti?

⁵Mwaŵadyetsa chisoni ngati chakudya, mwaŵapatsa misozi ngati chakumwa.

⁶Mwaŵasandutsa chinthu chonyozeka kwa anzathu a mitundu ina, ndipo adani athu akakhala pamodzi, amangotiseka.

⁷Inu Mulungu Wamphamvuzonse, tibwezereni mwakale, mutiwonetse nkhope yoŵala, kuti ife tipulumuke.

⁸Mudatulutsa mpesa wanu Israele m'dziko la Ejipito. Mudapirikitsa mitundu ina ya anthu kuti muubzale mpesawo.

⁹Mudaulimira munda mpesawo, udamera mizu yozama, nudzaza m'dzikolo.

¹⁰Mapiri adaphimbidwa ndi mthunzi wake, mikungudza yaikulu yomwe idaphimbidwa ndi nthambi zake.

¹¹Nthambizo zidafika mpaka ku nyanja yaikulu yakuzambwe, ndipo mphukira zake mpaka ku mtsinje waukulu wakuvuma.

¹²Nanga chifukwa chiyani mwagumula mpanda wake, kuti opita m'njira azithyola nawo zipatso zake?

¹³Nguluŵe zam'nkhalango zimauwononga, ndipo zonse zoyenda m'thengo zimaudya.

¹⁴Mutembenukirenso kwa ife, Inu Mulungu Wamphamvuzonse, muyang'ane Inu okhala kumwamba, ndipo muwone. Samalani mpesawo,

¹⁵mtengo woyambirira umene Inu mudaubzala ndi dzanja lanu lamanja.

¹⁶Adani athu autentha, augwetsa pansi. Ayang'aneni iwowo mokwiya ndi kuŵaononga.

¹⁷Koma ndi dzanja lanu muteteze anthu amene mudaŵasankha, anthu amene Inu nomwe mwaŵalimbikitsa kuti akutumikireni.

¹⁸Tsono sitidzakusiyaninso, tipatseni moyo, ndipo tidzatama dzina lanu mopemba.

¹⁹Inu Chauta, Mulungu Wamphamvuzonse, tibwezereni mwakale. Mutiwonetse nkhope yoŵala, kuti ife tipulumuke.