Read Buku Loyera - Chichewa Mas. 81 Bible Online

Mas. 81 - Buku Loyera - Chichewa bible

Mas. 81

¹Kwa Woimbitsa Nyimbo. Kutsata maimbidwe a Gititi. Salmo la Asafu. Kwezani mau kuimbira Mulungu amene ali mphamvu zathu. Fuulani ndi chimwemwe kwa Mulungu wa Yakobe.

²Yambani nyimbo, imbani ng'oma, pamodzi ndi pangwe wolira bwino ndi zeze.

³ Imbani lipenga mwezi ukaoneka chatsopano, ukaoneka kwathunthu, pa tsiku lathu lachikondwerero.

⁴Pakuti ndilo lamulo lokhalira Israele, lochokera kwa Mulungu wa Yakobe,

⁵Adalipereka lamulolo kwa zidzukulu za Yosefe pamene zinkatuluka m'dziko la Ejipito. Ndikumva liwu limene sindidalimve ndi kale lonse, lakuti,

⁶“Ndidakutulani katundu wa pamapeŵa panu. Manja anu ndidaŵachotsera ntchito yonyamula madengu.

⁷ Pamene munali m'mavuto mudandiitana, Ine nkukupulumutsani. Ndidakuyankhani ndili wobisika m'bingu. Ndidakuyesani ku madzi a Meriba aja.

⁸Imvani inu anthu anga, ndikulangizeni. Inu Aisraele, chonde mukadandimvera!

⁹ “Pasadzakhale mulungu wachilendo pakati panu. Musadzapembedze mulungu wina ai.

¹⁰Ine ndine Chauta, Mulungu wanu, amene ndidakutulutsani m'dziko la Ejipito. Yasamani kukamwa, Ine ndidzakudyetsani.

¹¹“Koma anthu anga sadamvere mau anga. Israele adandinyoza.

¹²Choncho ndidaŵasiya ndi mitima yao yosamverayo, kuti atsate zimene ankafuna.

¹³“Anthu anga akadandimvera, Aisraele akadayenda m'njira zanga,

¹⁴bwenzi posachedwa nditagonjetsa adani ao, ndipo dzanja langa likadakantha amaliwongo ao.

¹⁵“Anthu amene amadana ndi Chauta, akadakhwinyata pamaso pake, ndipo tsoka lao likadakhala mpaka muyaya.

¹⁶Ndikadakudyetsani ndi ufa wosalala watirigu, ndipo ndikadakukhutitsani ndi uchi wam'thanthwe.”