Read Buku Loyera - Chichewa Mas. 82 Bible Online

Mas. 82 - Buku Loyera - Chichewa bible

Mas. 82

¹Salmo la Asafu. Mulungu akutsogolera msonkhano wakumwamba. Akugamula mlandu milungu ya pansi pano.

²Akuti, “Mudzakhalabe mukuweruza mopanda chilungamo mpaka liti? Bwanji mukupitirizabe kumakondera anthu oipa?

³Inu tetezani anthu ofooka ndi amasiye mwachilungamo. Weruzani molungama ozunzika ndi amphaŵi.

⁴“Landitsani ofooka ndi osoŵa. Apulumutseni kwa anthu oipa.”

⁵Iwo sadziŵa kanthu ndiponso alibe nzeru, amangoyenda m'chimbulimbuli. Maziko onse a dziko lapansi agwedezeka.

⁶ Ine ndikuti, “Inu ndinu milungu, nonsenu ndinu ana a Mulungu Wopambanazonse.

⁷Komabe mudzafa ngati anthu onse, ndipo mudzagwa ngati kalonga wina aliyense.”

⁸Dzambatukani, Inu Mulungu, weruzani dziko lapansi, popeza kuti mitundu yonse ya anthu ndi yanu.