Read Buku Loyera - Chichewa Mas. 83 Bible Online

Mas. 83 - Buku Loyera - Chichewa bible

Mas. 83

¹Salmo. Nyimbo ya Asafu. Inu Mulungu, musakhalenso chete. Musangoti phee, musangoti duu, Inu Mulungu.

²Onani, adani anu akuchita chiwawa. Amene adana nanu akukuukirani.

³Akuchitira anthu anu upo wonyenga. Akuŵapangira zoipa anthu anu amene mumaŵateteza.

⁴Iwo amati, “Tiyeni tifafanize mtundu wao wonse. Dzina la Israele lisakumbukikenso.”

⁵Zoonadi, akumvana popangana chiwembu, akupangana zokuukirani,

⁶anthu okhala m'mahema a Aedomu ndi Aismaele, Amowabu ndi Ahagara,

⁷Agebala ndi Aamoni ndi Aamaleke, Afilisti pamodzi ndi nzika za ku Tiro.

⁸Aasiriya nawonso agwirizana nawo, kuti alimbikitse mphamvu za ana a Loti.

⁹ Muŵachite zomwe mudaŵachita Amidiyani, Sisera ndi Yabini ku mtsinje wa Kisoni,

¹⁰amene adaŵaononga ku Endori, ndi kuŵasandutsa ndoŵe m'nthaka.

¹¹ Akalonga ao muŵachite zomwe mudachita Orebu ndi Zeebu, ndipo ana a mafumu ao onse, muŵachite zomwe mudachita Zeba ndi Zalimuna,

¹²amene adati, “Tiyeni tilande dziko la Mulungu likhale lathu.”

¹³Inu Mulungu wanga, muŵasandutse ngati fumbi louluka ndi kamvulumvulu, akhale ngati mankhusu ouluka ndi mphepo.

¹⁴Monga momwe moto umatenthera nkhalango, monga momwe malaŵi amayakira pa mapiri,

¹⁵momwemonso Inu muŵapirikitse ndi mkuntho, ndipo muŵaopseze ndi kamvulumvulu wanu.

¹⁶Inu Chauta, muŵachititse manyazi, kuti azifunafuna dzina lanu.

¹⁷Achitedi manyazi ndi mantha mpaka muyaya, ndipo afe imfa yonyozeka.

¹⁸Adziŵe kuti Inu nokha, amene dzina lanu ndinu Chauta, ndinu Wopambanazonse wolamulira dziko lonse lapansi.