Read Buku Loyera - Chichewa Mas. 84 Bible Online

Mas. 84 - Buku Loyera - Chichewa bible

Mas. 84

¹Kwa Woimbitsa Nyimbo. Kutsata maimbidwe a Gititi. Salmo la ana a Kora. Malo amene mumakhalamo, Inu Chauta Wamphamvuzonse, ndi okoma kwambiri.

²Mtima wanga ukulakalaka, mpaka kukomoka, kufunitsitsa kuwona mabwalo a Chauta. Inu Mulungu wamoyo, ndikukuimbirani mwachimwemwe ndi mtima wanga wonse.

³Ngakhale timba amapeza malo okhalapo, nayenso namzeze amamanga chisa chake m'mene amagonekamo ana ake, pafupi ndi maguwa anu, Inu Chauta Wamphamvuzonse, Mfumu yanga ndi Mulungu wanga.

⁴Ngodala anthu amene amakhala m'Nyumba mwanu, namaimba nyimbo zotamanda Inu nthaŵi zonse.

⁵Ngodala anthu amene mphamvu zao nzochokera kwa Inu, amene m'mitima mwao amafunitsitsa kudzera m'miseu yopita ku Ziyoni.

⁶Akamadutsa chigwa cha Baka chopanda madzi, amachisandutsa malo a akasupe, mvula yachizimalupsa imachidzaza ndi zithaphwi.

⁷Mphamvu zao zimanka zichulukirachulukira. Mulungu wa milungu adzaoneka m'Ziyoni.

⁸Inu Chauta, Mulungu Wamphamvuzonse, imvani pemphero langa. Tcherani khutu, Inu Mulungu wa Yakobe.

⁹Inu Mulungu, ndinu chishango chathu, yang'anani nkhope ya wodzozedwa wanu.

¹⁰Kukhala tsiku limodzi m'mabwalo anu nkwabwino kwambiri kupambana kukhala masiku ambiri kwina kulikonse. Nkadakonda kukhala wapakhomo wa Nyumba ya Mulungu wanga kupambana kukhala m'nyumba za anthu oipa.

¹¹Pakuti Chauta ndiye dzuŵa ndi chishango, amatichitira chifundo ndi kutipatsa ulemu. Chauta saŵamana zabwino anthu oyenda molungama.

¹²Inu Chauta Wamphamvuzonse, ngwodala munthu woika chikhulupiriro chake pa Inu.