Read Buku Loyera - Chichewa Mas. 85 Bible Online

Mas. 85 - Buku Loyera - Chichewa bible

Mas. 85

¹Kwa Woimbitsa Nyimbo. Salmo la ana a Kora. Inu Chauta, mudakomera mtima dziko lanu, mudaŵakhazikanso pabwino a m'banja la Yakobe.

²Mudakhululukira machimo a anthu anu, mudafafaniza zolakwa zao zonse.

³Mudaleka ndithu ukali wanu woopsa, mudaletsa mkwiyo wanu woyaka moto.

⁴Mutibwezerenso mwakale, Inu Mulungu Mpulumutsi wathu, ndipo mutichotsere mkwiyo wanu.

⁵Kodi mudzakhalabe mukutikwiyira mpaka muyaya? Kodi mudzapitiriza kukwiya mpaka pa mibadwo yathu yonse?

⁶Kodi simudzatipatsanso moyo, kuti ife anthu anu tikondwere mwa Inu?

⁷Tiwonetseni chikondi chanu chosasinthika, Inu Chauta, ndipo mutipulumutse.

⁸Ndimve zimene Chauta adzalankhula, chifukwa adzalankhula za mtendere kwa anthu ake, kwa anthu ake oyera mtima, ngati sabwereranso ku zopusa zao.

⁹Zoonadi, Mulungu ali wokonzekera kuti apulumutse amene amamuwopa, kuti ulemerero wake ukhale m'dziko lathu.

¹⁰Chikondi chosasinthika ndi kukhulupirika zidzakumana. Chilungamo ndi mtendere zidzagwirizana.

¹¹Anthu ake adzakhala okhulupirika pansi pano, ndipo Mulungu wakumwamba adzaŵalungamitsa.

¹²Inde, Chauta adzapereka zabwino, ndipo dziko lathu lidzabereka zokolola zambiri.

¹³Mulungu ndi wolungama chikhalire, chilungamo chake chimaongolera zochita zake zonse.