Read Buku Loyera - Chichewa Mas. 87 Bible Online

Mas. 87 - Buku Loyera - Chichewa bible

Mas. 87

¹Mzinda umene Chauta adamanga maziko ake, uli pa phiri loyera.

²Chauta amakonda mzinda wa Ziyoni amaukonda kupambana kwina kulikonse kumene zidzukulu za Yakobe zimakhala.

³Iwe mzinda wa Mulungu, anthu amakamba zambiri zotamanda iwe.

⁴Amati, “Pakati pa amene amandidziŵa, ndikutchula Rahabu[4] ndi Babiloni. Ponena za dziko la Filistiya, Tiro ndi Etiopiya, anthu amati, ‘Uje adabadwira kumeneko.’ ”

⁵Koma ponena za Ziyoni adzati, “Onse adabadwira kumeneko,” chifukwa Wopambanazonse mwini wake ndiye amene adzaulimbitsa mzindawo.

⁶Tsono polemba maina a mitundu yonse ya anthu, Chauta adzati, “Wakutiwakuti adabadwira ku Ziyoni.”

⁷Oimba ndi ovina adzati, “Ziyoni ndiwe kasupe wa madalitso athu onse.”