Read Buku Loyera - Chichewa Mas. 88 Bible Online

Mas. 88 - Buku Loyera - Chichewa bible

Mas. 88

¹Salmo la ana a Kora. Kwa Woimbitsa Nyimbo. Kutsata maimbidwe a nyimbo yoti: Pa matenda ndi pa mazunzo. Ndakatulo ya Hemani wa fuko la Ezara. Inu Chauta, Mpulumutsi wanga, ndimalirira Inu usana ndi usiku, kuti mundithandize.

²Pemphero langa lifike kwa Inu, tcherani khutu kuti mumve kulira kwanga.

³Pakuti mtima wanga ndi wodzaza ndi mavuto, moyo wanga ukuyandikira ku malo a anthu akufa.

⁴Ndikuŵerengedwa pamodzi ndi anthu otsikira ku manda. Ndasanduka munthu wopanda mphamvu.

⁵Ndili ngati munthu womsiya yekha pakati pa anthu akufa, ngati munthu wophedwa amene wagona m'manda. Ndili ngati anthu amene Inu simuŵakumbukiranso, popeza kuti ndi ochotsedwa m'manja mwanu.

⁶Inu mwandiika pansi penipeni pa dzenje m'malo akuya a mdima wandiweyani.

⁷Mkwiyo wanu ukundipsinja, mukundimiza ndi mafunde anu onse.

⁸Inu mwachititsa kuti anzanga azindithaŵa, mwandisandutsa chinthu choŵanyansa. Ndatsekerezedwa kotero kuti sindingathe kuthaŵa.

⁹M'maso mwanga mwada ndi chisoni. Tsiku ndi tsiku ndimakuitanani, Inu Chauta, Ndimakweza manja anga kwa Inu.

¹⁰Kodi zodabwitsa mumachitira anthu akufa? Kodi iwowo nkuuka kuti akutamandeni?

¹¹Kodi chikondi chanu chosasinthikacho amachilalikira ku manda? Kodi amasimba za kukhulupirika kwanu ku malo achiwonongeko?

¹²Kodi zodabwitsa zanu zimadziŵika mu mdima? Ndani angadziŵe za chithandizo chanu chopulumutsa m'dziko la anthu oiŵalika?

¹³Koma ine ndimalirira Inu Chauta, m'maŵa pemphero langa limakafika kwa Inu.

¹⁴Inu Chauta, chifukwa chiyani mukunditaya? Chifukwa chiyani mukundibisira nkhope yanu?

¹⁵Kuyambira ubwana wanga mpaka kukula, ndakhala ndikupirira zilango zanu pozunzika mpaka pafupi kufa, tsopano ndatheratu.

¹⁶Mkwiyo wanu wandimiza, moyo wanga waonongekeratu ndi ukali wanu woopsa.

¹⁷Zonsezi zimandizinga tsiku lonse ngati chigumula, zanditsekereza kwathunthu.

¹⁸Inu mwathaŵitsa anthu ondikonda ndi abwenzi anga, mdima wokha ndiye mnzanga amene wanditsalira.