Read Buku Loyera - Chichewa Mas. 9 Bible Online

Mas. 9 - Buku Loyera - Chichewa bible

Mas. 9

¹Kwa Woimbitsa Nyimbo. Kutsata maimbidwe a nyimbo yoti: Imfa ya Mwana. Salmo la Davide. Ndidzakuthokozani, Inu Chauta, ndi mtima wanga wonse. Ndidzasimba za ntchito zanu zonse zodabwitsa.

²Ndidzakondwa ndi kusangalala chifukwa cha Inu, ndidzaimba nyimbo zotamanda dzina lanu, Inu Wopambanazonse.

³Mukangofika, adani anga amathaŵa, amaphunthwa ndi kufa pamaso panu.

⁴Inu mwatsimikiza kusalakwa kwanga. Mwakhala pa mpando woweruza, mwagamula kuti ndine wosapalamula.

⁵Mwaimba mlandu mafuko a anthu, mwaononga anthu oipa. Adzaiŵalika mpaka muyaya.

⁶Adani athu atha phu. Mwapasula mizinda yao kotheratu, anthu sadzaikumbukiranso.

⁷Koma Chauta amakhala pa mpando wake waufumu nthaŵi zonse, adakhazika mpando wake kuti aziweruza.

⁸Iye amaweruza dziko lapansi molungama, amagamula milandu ya anthu mosakondera.

⁹Kwa Chauta ndiye kothaŵirako anthu opsinjidwa, ndiyenso kopulumukira pa nthaŵi yamavuto.

¹⁰Amene amadziŵa dzina lanu, Inu Chauta, amakukhulupirirani, pakuti Inu Chauta simuŵasiya anthu okufunitsitsani.

¹¹Imbani nyimbo zotamanda Chauta amene amakhala ku Ziyoni. Lalikani za ntchito zake kwa anthu a mitundu yonse.

¹²Paja Iye amachitira chifundo anthu ozunzika, salephera kumva kulira kwao ndipo amalanga anthu oŵazunzawo.

¹³ Mundikomere mtima, Inu Chauta. Onani m'mene akundisautsira anthu ondida. Inu mumandipulumutsa ku imfa,

¹⁴kuti ndithe kuyamika ntchito zanu zonse, pakati pa anthu anu a mu Ziyoni. Zoonadi ndidzakondwa chifukwa mwandipulumutsa.

¹⁵Akunja agwera m'mbuna yokumba iwo omwe. Phazi lao lakodwa mu ukonde wobisika wotcha iwo omwe.

¹⁶Chauta wadziwulula yekha, pakuweruza molungama, koma anthu oipa akodwa mu msampha wotcha iwo omwe.

¹⁷Tsono anthu oipa adzapita ku dziko la anthu akufa, ndiye kuti anthu onse amene amakana Mulungu.

¹⁸Koma anthu aumphaŵi Mulungu saŵaiŵala nthaŵi zonse, anthu osauka Mulungu saŵagwiritsa mwala mpang'ono pomwe.

¹⁹Dzambatukani, Inu Chauta, munthu asakunyozeni. Azengeni mlandu anthu akunja.

²⁰Inu Chauta, aopseni anthuwo. Akunjawo adziŵe kuti iwo ndi anthu chabe.