Read Buku Loyera - Chichewa Mas. 90 Bible Online

Mas. 90 - Buku Loyera - Chichewa bible

Mas. 90

¹Pemphero la Mose, munthu wa Mulungu. Inu Ambuye, ndinu kothaŵira kwathu pa mibadwo yonse.

²Mapiri asanabadwe, ndipo musanalenge dziko lapansi ndi pokhala anthu, ndinu Mulungu kuyambira muyaya mpaka muyaya.

³Inu mumabwezera anthu ku fumbi, ndipo mumati, “Bwererani inu ana a anthu.”

⁴Pakuti zaka chikwi chimodzi pamaso panu zili ngati dzulo chabe, kapena ngati kamphindi chabe kausiku.

⁵Inu mumachotsa moyo wa anthu mwadzidzidzi. Ali ngati maloto, ali ngati udzu wongotsitsimuka m'maŵa.

⁶M'mamaŵamo umatsitsimuka ndipo umakondwa. Madzulo umafota ndi kuuma.

⁷Ife tapseratu ndi mkwiyo wanu woyaka, tikufa ndi mantha chifukwa cha ukali wanu.

⁸Inu mwaika machimo athu pamaso panu, ngakhale machimo obisika mwaŵaonetsa poyera.

⁹Pajatu masiku athu amachepa chifukwa cha mkwiyo wanu, zaka zathu zimatha ngati kuusa moyo chabe.

¹⁰Zaka za moyo wathu nzokwanira makumi asanu ndi aŵiri, tikakhala amphamvu, ndiye makumi asanu ndi atatu. Koma zaka zonsezo ndi za nkhaŵa ndi mavuto. Zakazo zimatha msanga, ife nkumapita.

¹¹Kodi ndani amadziŵa kukula kwa mkwiyo wanu ndi ukali wanu, kupambana anthu okuwopani?

¹²Tsono tiphunzitseni kuŵerenga masiku athu, kuti tikhale ndi mtima wanzeru.

¹³Lezani mtima, Inu Chauta. Nanga mudzatikwiyira mpaka liti? Achitireni chifundo atumiki anu.

¹⁴Tidzazeni m'maŵa mulimonse ndi chikondi chanu chosasinthika, kuti tizikondwa ndi kusangalala masiku athu onse.

¹⁵Tisangalatseni masiku ambiri monga masiku amene mudatisautsira, zaka zambiri monga zaka zimene tidaona mavuto.

¹⁶Mulole kuti ntchito zanu ziwoneke kwa atumiki anu, mphamvu zanu zaulemerero ziwoneke kwa ana ao.

¹⁷Inu Ambuye, Mulungu wathu, mutikomere mtima, ndi kudalitsa zonse zimene timachita, ndithu mudalitse ntchito zonse za manja athu.