Read Buku Loyera - Chichewa Mas. 91 Bible Online

Mas. 91 - Buku Loyera - Chichewa bible

Mas. 91

¹Munthu amene amakhala m'linga la Wopambanazonse, iye amene amakhala mumthunzi mwa Mphambe,

²adzanena kwa Chauta kuti, “Inu ndinu kothaŵira kwanga ndi linga langa, ndinu Mulungu wanga amene ndimakukhulupirirani.”

³Ndithu, Iye adzakupulumutsa ku msampha wa wosaka, ndiponso ku mliri woopsa.

⁴Adzakuphimba ndi nthenga za mapiko ake, udzapeza malo othaŵirako m'mapikomo. Kukhulupirika kwake kumateteza monga chishango ndi lihawo.

⁵Sudzachita mantha ndi zoopsa zausiku, kapena nkhondo nthaŵi yamasana.

⁶Sudzaopanso mliri wogwa usiku, kapena zoononga moyo masana.

⁷Anzako chikwi chimodzi angathe kuphedwa pambali pakopa, kapena zikwi khumi ku dzanja lako lamanja, koma iwe zoopsazo sizidzakukhudza.

⁸Uzingopenya ndi maso ako, ndipo udzaona m'mene amalangidwira anthu ochita zoipa.

⁹Chifukwa chakuti wavomera Chauta kuti akhale malo ako othaŵirako, wavomera Wopambanazonse kuti akhale malo ako okhalamo,

¹⁰zoipa sizidzakugwera, zoopsa sizidzafika pafupi ndi nyumba yako.

¹¹ Chauta adzapatsa angelo ake ntchito yoti azikulonda kulikonse kumene upite.

¹²Adzakunyamula m'manja mwao, kuwopa kuti phazi lako lingapweteke ndi mwala.

¹³ Udzatha kuponda mkango ndi njoka, zoonadi udzaponda ndi phazi lako msona wa mkango ndiponso chinjoka.

¹⁴Pakuti amene amandikangamira Ine Mulungu mwachikondi, ndidzampulumutsa. Ndidzamteteza popeza kuti amadziŵa dzina langa.

¹⁵Akadzandiitana, ndidzamuyankha, ndidzakhala naye pa nthaŵi yamavuto. Ndidzamlanditsa ndi kumlemekeza.

¹⁶Ndidzampatsa moyo wautali ndi kumpulumutsa.