Read Buku Loyera - Chichewa Mas. 92 Bible Online

Mas. 92 - Buku Loyera - Chichewa bible

Mas. 92

¹Nyimbo ya pa Sabata. Nkwabwino kuthokoza Chauta, kuimba nyimbo zotamanda dzina lanu, Inu Wopambanazonse.

²Nkwabwino m'maŵa kulalika za chikondi chanu chosasinthika, ndipo usiku kusimba za kukhulupirika kwanu,

³poimba nyimbo zokoma ndi gitara, zeze ndi pangwe.

⁴Inu Chauta, mwandisangalatsa ndi ntchito zanu. Motero ndikufuula ndi chimwemwe chifukwa cha zimene Inu mwachita.

⁵Ntchito zanu si kukula kwake, Inu Chauta! Maganizo anu si kuzama kwake!

⁶Munthu wopanda nzeru sangadziŵe, munthu wopusa sangamvetse zimenezi, zakuti,

⁷ngakhale anthu oipa aziphuka ngati udzu, ndipo anthu ochimwa zinthu ziziŵayendera bwino, kwao nkuwonongeka kwamuyaya.

⁸Inu nokha Chauta, ndinu Wopambanazonse mpaka muyaya.

⁹Ndithudi adani anu, Inu Chauta, adani anu adzaonongeka, onse ochita zoipa adzamwazikana.

¹⁰Koma ine mwandilimbitsa ngati njati. Mwandidzoza ndi mafuta atsopano.

¹¹Maso anga aona kuwonongeka kwa adani anga, makutu anga amva za kugwa kwa adani ondiwukira.

¹²Anthu okondweretsa Mulungu zinthu zimaŵayendera bwino ngati mitengo ya mgwalangwa, amakula ngati mikungudza ya ku Lebanoni.

¹³Ali ngati mitengo yookedwa m'Nyumba ya Chauta, yokondwa m'mabwalo a Nyumba ya Mulungu wathu.

¹⁴Mitengoyi imabalabe zipatso ngakhale itakalamba, nthaŵi zonse imakhala ndi madzi ndipo imabiriŵira,

¹⁵imaonetsa kuti Chauta ndi wolungama. Iye ndiye thanthwe langa mwa Iye mulibe chokhota.