Read Buku Loyera - Chichewa Mas. 94 Bible Online

Mas. 94 - Buku Loyera - Chichewa bible

Mas. 94

¹Inu Chauta, ndinu Mulungu wolipsira, Inu Mulungu wolanga, dziwonetseni.

²Dzambatukani, Inu Muweruzi wa dziko lapansi, apatseni anthu onyada zoŵayenerera.

³Inu Chauta, kodi anthu oipa adzadzitamabe mpaka liti?

⁴Amalankhula modzikuza ndipo amanyadira zoipa zao.

⁵Amatswanya anthu anu, Inu Chauta, amazunza anthu anu osankhidwa.

⁶Amapha akazi amasiye ndi alendo okhala nawo m'dziko mwao, amaphanso ana amasiye.

⁷Kenaka amati, “Chauta sakuwona, Mulungu wa Yakobe sakuzidziŵa.”

⁸Mvetsani anthu opusa kwambirinu. Zitsiru inu, mudzakhala ndi nzeru liti?

⁹Kodi amene adalenga makutu, sangathe kumva? Kodi amene adapanga maso, sangathe kupenya?

¹⁰Kodi wolangiza mitundu ya anthu, sangathe kulanga? Kodi wophunzitsa anthu onse, alibe nzeru?

¹¹Chauta amadziŵa maganizo a anthu kuti ndi mpweya chabe.

¹²Inu Chauta, ngwodala munthu amene mumamlangiza, amene mumamphunzitsa ndi malamulo anu.

¹³Mumampumitsa pa nthaŵi yamavuto, mpaka woipa ataloŵa m'dzenje.

¹⁴Chauta sadzaŵataya anthu ake, sadzaŵasiya okha osankhidwa ake.

¹⁵Chilungamo chidzaŵabwereranso kwa anthu ake, ndipo onse oongoka mtima adzachitsata.

¹⁶Ndani amalimba mtima kuti andimenyere nkhondo ndi anthu oipa? Ndani amaimira mbali yanga, kuti alimbane ndi anthu ochita zoipa?

¹⁷Chauta akadapanda kundithandiza, bwenzi posachedwa nditapita ku dziko lazii.

¹⁸Pamene ndinkaganiza kuti, “Phazi langa likuterereka,” nkuti chikondi chanu chosasinthika chikundichirikiza.

¹⁹Pamene nkhaŵa zikundichulukira, Inu mumasangalatsa mtima wanga.

²⁰Kodi angathe kugwirizana nanu olamulira oipa, amene amapotoza malamulo anu olungama?

²¹Amagwirizana kuti aononge anthu osalakwa, nagamula kuti opanda mlandu aphedwe.

²²Koma Chauta wasanduka linga langa londiteteza, Mulungu ndiye thanthwe langa lothaŵirako.

²³Adzaŵalanga chifukwa cha machimo ao, adzaŵaononga chifukwa cha kuipa kwao, zoonadi, Chauta, Mulungu wathu, ndiye amene adzaŵafafanize.