Read Buku Loyera - Chichewa Mas. 97 Bible Online

Mas. 97 - Buku Loyera - Chichewa bible

Mas. 97

¹Chauta ndiye Mfumu, anthu a pa dziko lapansi akondwere, anthu onse a m'mbali mwa nyanja asangalale.

²Mitambo ndi mdima waukulu zamzinga Chauta. Amalamulira molungama, mu ufumu wake mulibe tsankho.

³Moto umapita patsogolo pake, umapsereza adani ake omzinga kulikonse.

⁴Zing'aning'ani zake zimaŵalitsa dziko lonse lapansi, dziko lonse limapenya nkugwedezeka.

⁵Mapiri amasungunuka ngati sera pamaso pa Chauta, ndiye wolamulira dziko lonse lapansi.

⁶Zakumwamba zimalalika za kulungama kwake, ndipo anthu a mitundu yonse amaona ulemerero wake.

⁷Onse opembedza milungu yonama, amene amanyadira mafano achabechabe, amachititsidwa manyazi, pakuti milungu ina yonse imagonjera Chauta.

⁸Anthu a ku Ziyoni akumva, ndipo akusangalala, midzi ya ku Yuda nayonso ikukondwera chifukwa cha kaweruzidwe kanu, Inu Chauta.

⁹Pakuti Inu Chauta ndinu Wopambanazonse, wolamulira dziko lonse lapansi. Ndinu amphamvu kupambana milungu yonse.

¹⁰Chauta amakonda anthu odana ndi zoipa. Iye amasunga moyo wa anthu ake oyera mtima. Amaŵapulumutsa kwa anthu oipa.

¹¹Amaŵalira anthu amene amamumvera, ndipo anthuwo amakhaladi ndi chimwemwe.

¹²Inu ndi anthu a Chauta, kondwerani mwa iye, ndipo mumthokoze potchula dzina lake loyera.