Read Buku Loyera - Chichewa Miy. 1 Bible Online

Miy. 1 - Buku Loyera - Chichewa bible

Miy. 1

¹ Aŵa ndi malangizo a Solomoni, mwana wa Davide, mfumu ya Israele.

²Ngothandiza kuti anthu adziŵe nzeru ndi mwambo, kuti amvetse mau a matanthauzo ozama,

³kuti alandire mwambo wochita zinthu mwanzeru, akhale angwiro, achilungamo ndi osakondera.

⁴Ngophunzitsa anthu wamba nzeru za kuchenjera, ndi achinyamata kudziŵa zinthu ndi kulingalira bwino.

⁵Ndi oti wanzeru akaŵamva, aonjezere kuphunzira kwake, ndipo munthu womvetsa zinthu apate luso,

⁶kuti azimvetsa miyambi ndi mafanizo, mau a anthu anzeru ndi mikuluŵiko yao.

⁷ Kuwopa Chauta ndiye chiyambi cha nzeru. Zitsiru ndiye zimanyoza nzeru ndi malangizo.

⁸Mwana wanga, umvere zimene bambo wako akukulangiza, usakane zimene mai wako akukuphunzitsa.

⁹Zili ngati nsangamutu yokongola yamaluŵa pamutu pako, zili ngati mkanda wa m'khosi mwako.

¹⁰Mwana wanga, anthu oipa akafuna kukukopa, usamaŵamvera.

¹¹Adzati, “Tiye kuno, tikabisale kuti tiphe anthu, tiye tikalalire anthu osalakwa.

¹²Tiyeni tiŵameze amoyo ngati manda, tiŵameze athunthu ngati anthu otsikira ku manda.

¹³Motero tidzapata zinthu zambiri zamtengowapatali, nyumba zathu tidzazidzaza ndi zofunkha.

¹⁴Tiye uloŵe m'gulu lathu, chuma chathu tidzagaŵana tonse.”

¹⁵Mwana wanga, usamayenda nawo anthu amenewo, usatsagane nawo pa njira yaoyo.

¹⁶Paja iwowo amangofuna zoipa zokhazokha, amathamangira kupha basi.

¹⁷Nkopanda phindu kutchera kumwezi, nanga mbalame siziwona!

¹⁸Koma anthu ameneŵa amangodzitchera okha msampha, m'menemo muli imfa yao yomwe.

¹⁹Ameneŵa ndiwo mathero a anthu opata chuma mwankhondo. Chumacho chimapha eniake ochikundika.

²⁰ Nzeru ikufuula mu mseu, ikulankhula mokweza mau m'misika.

²¹Ikufuula pa mphambano za miseu, ikulankhula pa zipata za mzinda, kuti,

²²“Kodi anthu osachangamukanu, mudzakondwerabe kupusaku mpaka liti? Kodi anthu onyodola, adzakhalabe akunyodola mpaka liti? Nanga opusa adzakana kuphunzira zanzeru mpaka liti?

²³Musamale kudzudzula kwangaku, ine ndikuuzani maganizo anga, ndi kukudziŵitsani mau anga.

²⁴Paja ine ndidaakuitanani, inu nkukana kumvera, ndidaati ndikuthandizeni, koma popanda wosamalako.

²⁵Uphungu wanga simudaulabadire, kudzudzula kwanga simudakusamale.

²⁶Ndiye inenso ndidzakusekani, mukadzagwa m'mavuto, ndidzakunyodolani, mukadzazunguzika ndi mantha,

²⁷pamene mantha adzakukunthani ngati namondwe, pamene tsoka lidzakufikirani ngati kamvulumvulu, pamene mavuto ndi masautso adzakugwerani.

²⁸Tsono mudzandiitana, koma ine sindidzaitaŵa, mudzandifunafuna mwakhama, koma simudzandipeza.

²⁹Popeza kuti mudadana ndi nzeru, ndipo simudasankhe kuwopa Chauta,

³⁰popeza kuti simudasamale malangizo anga, ndipo mudanyoza kudzudzula kwanga konse,

³¹basitu tsono mudzadya zipatso zoyenera ntchito zanuzo, mudzakhuta zoipa zimene munkafuna kuŵachita ena.

³²Anthu opusa amaphedwa chifukwa cha kusokera kwao. Zitsiru zimadziwononga zokha nkudzitama kwao.

³³Koma amene amamvera ine adzakhala pabwino, adzakhala mosatekeseka, osaopa choipa chilichonse”.