Read Buku Loyera - Chichewa Miy. 10 Bible Online

Miy. 10 - Buku Loyera - Chichewa bible

Miy. 10

¹Miyambo ya Solomoni: Mwana wanzeru amakondweretsa atate ake, koma mwana wopusa amanyoza amai ake.

²Chuma chochipeza monyenga sichipindulitsa, koma chilungamo chimapulumutsa ku imfa.

³Chauta salola kuti munthu womukondweretsa iye, azikhala ndi njala, koma zimene woipa amazilakalaka, Mulungu amam'mana.

⁴Manja aulesi amagwetsa munthu mu umphaŵi, koma manja achangu amalemeretsa munthu.

⁵Mwana womakolola nthaŵi yachilimwe ndiye wanzeru, koma womangogona nthaŵi yokolola amachititsa manyazi.

⁶Madalitso amakhala pa munthu wokondweretsa Mulungu, koma pakamwa pa munthu woipa pamabisa zandeu.

⁷Munthu wabwino anzake adzamkumbukira ngati dalitso, pamene woipa, mbiri yake idzatha ngati chinthu choola.

⁸Munthu wa mtima wanzeru adzasamala malamulo, koma chitsiru chomangolongolola chidzaonongeka.

⁹Munthu woyenda mwaungwiro, amayenda mosatekeseka. Koma woyenda njira zoipa, adzadziŵika.

¹⁰Munthu wotsinzinira maso monyenga, amadzetsa mavuto, wodzudzula molimba mtima amadzetsa mtendere.

¹¹Pakamwa pa munthu wabwino ndi kasupe wa moyo, koma pakamwa pa munthu woipa pamabisa zandeu.

¹² Chidani chimautsa mikangano, koma chikondi chimaphimba zolakwa zonse.

¹³Pakamwa pa munthu womvetsa zinthu pamatuluka zanzeru, koma pamsana pa munthu wopanda nzeru sipachoka tsatsa.

¹⁴Anzeru amakundika nzeru, koma kubwebwetuka kwa chitsiru kumadzetsa chiwonongeko.

¹⁵Chuma cha munthu wolemera ndiye chitetezo chake, koma umphaŵi wa anthu osauka ndiye chiwonongeko chao.

¹⁶Moyo ndiye malipiro a anthu ochita zabwino, koma phindu la ochimwa limadzetsa machimo ena.

¹⁷Wosamala malangizo amayenda pa njira ya moyo, koma wokana chidzudzulo amasokera.

¹⁸Wobisa chidani chake ndi munthu wonama, ndipo wochita ugogodi nchitsiru.

¹⁹Mau akachuluka, zolakwa sizisoŵa, koma amene amasunga pakamwa ndi wanzeru.

²⁰Mau a munthu wochita zabwino, ali ngati siliva wabwino kwambiri, koma maganizo a anthu oipa ngachabe.

²¹Mau a anthu wabwino amaphunzitsa ambiri, koma zitsiru zimafa chifukwa chosoŵa nzeru.

²²Madalitso a Chauta ndiwo amalemeretsa, ntchito za munthu siziwonjezerapo kanthu.

²³Kwa chitsiru kulakwa kumakhala ngati maseŵera, koma kwa munthu womvetsa zinthu kuchita zanzeru ndiye kumapatsa chimwemwe.

²⁴Chimene woipa amachiwopa chidzamgwera, koma zimene munthu wabwino amazilakalaka adzazipeza.

²⁵Namondwe akaomba, oipa amachotsedwa, koma anthu ochita chilungamo amakhazikika mpaka muyaya.

²⁶Momwe amakhalira vinyo wosasa m'kamwa, momwe umakhalira utsi m'maso, ndi momwenso amakhalira mlesi kwa amene amamtuma.

²⁷Kuwopa Chauta kumatalikitsa moyo, koma zaka za anthu oipa zidzachepa.

²⁸Chiyembekezo cha wokhulupirira chimapezetsa chimwemwe, koma zimene woipa amayembekezera, zimafera m'mazira.

²⁹Chauta ndi linga loteteza munthu woyenda molungama, koma amaononga wochita zoipa.

³⁰Munthu wabwino sadzachotsedwa pamalo pake, koma woipa sadzakhazikika pa dziko.

³¹Pakamwa pa wochita chilungamo pamatuluka zanzeru, koma lilime lokhota adzalidula.

³²Anthu omvera Mulungu amadziŵa zoyenera kulankhula, koma pakamwa pa anthu oipa pamatuluka zosayenera.