Read Buku Loyera - Chichewa Miy. 11 Bible Online

Miy. 11 - Buku Loyera - Chichewa bible

Miy. 11

¹Muyeso wonyenga umanyansa Chauta, koma muyeso wachilungamo umamkondweretsa.

²Kunyada kukaloŵa, pamafikanso manyazi, koma pali kudzichepetsa, palinso nzeru.

³Ungwiro wa anthu olungama umaŵatsogolera, koma makhalidwe okhota a anthu onyenga ngoononga.

⁴Pa tsiku la mkwiyo wa Mulungu chuma sichithandiza konse, koma chilungamo ndiye chimapulumutsa ku imfa.

⁵Kulungama kwa anthu angwiro kumaŵathandiza pa moyo wao, koma kuipa mtima kumagwetsa mwiniwake yemweyo.

⁶Kulungama kwa munthu woyera mtima kumampulumutsa, koma zilakolako zoipa zimaŵaika mu ukapolo anthu onyenga.

⁷Woipa akafa, chikhulupiriro chake chimathanso, chiyembekezo cha wosasamala za Mulungu chilibe phindu.

⁸Anthu a Mulungu amapulumuka ku mavuto, koma m'malo mwake amagwamo ndi oipa mtima.

⁹Munthu wosalabadirako za Mulungu amaononga mnzake ndi pakamwa pake; munthu wochita chilungamo amapulumuka chifukwa cha kudziŵa zinthu.

¹⁰Mulungu akamadalitsa anthu ake, mzinda wonse umatukuka. Oipa akaonongeka, anthu amafuula mwachimwemwe.

¹¹Madalitso olandira anthu olungama amakweza mzinda, koma pakamwa pa anthu oipa mtima pamapasula mzindawo.

¹²Wosukitsa anzake ngwopanda nzeru, koma womvetsa zinthu amalonda pakamwa pake.

¹³Amene amanka nachita ukazitape, amaulula zinsinsi. Koma wa mtima wokhulupirika, amasunga pakamwa pake.

¹⁴ Kumene kulibe uphungu, anthu amagwa, koma kumene kuli aphungu ambiri, kumakhala mtendere.

¹⁵Woperekera wachilendo chigwiriro, adzapeza mavuto, koma wodana ndi za chigwiriro, amakhala pa mtendere.

¹⁶Mkazi wa mkhalidwe wabwino amalandira ulemu, koma amuna ankhanza amangopata chuma.

¹⁷Munthu wachifundo amadzipindulira zabwino, koma munthu wankhwidzi amadzipweteka yekha.

¹⁸Munthu woipa amalandira malipiro achabechabe, koma wochita zolungama amalandira mphotho yeniyeni.

¹⁹Wofunitsitsa chilungamo, adzakhala moyo. Koma wothamangira zoipa, adzafa.

²⁰Anthu a mtima woipa amamnyansa Chauta, koma anthu a makhalidwe abwino amamkondweretsa.

²¹Zoonadi, anthu oipa chilango sichidzamuphonya, koma anthu a Mulungu adzapulumuka.

²²Momwe chimaonekera chipini chagolide chikakhala pa mpuno wa nkhumba, ndi momwenso kumakhalira kukongola kwa mkazi wam'kamwa.

²³Zimene anthu abwino amazilakalaka zimathera mwabwino, koma zimene oipa amayembekezera zimathera ku mkwiyo wa Mulungu.

²⁴Wina amatha kupatsako anzake zinthu mwaufulu, komabe amanka nalemereralemerera. Wina nkukhala wakaligwiritsa, nakhalabe wosauka.

²⁵Munthu wa mtima waufulu adzalemera, wothandiza anzake nayenso adzalandira thandizo.

²⁶Anthu amatemberera munthu womana anzake chakudya, koma amalemekeza munthu wogulitsa chakudyacho.

²⁷Munthu wofunafuna zabwino mwakhama, amapeza zokoma, koma wofunafuna zoipa, zidzampeza.

²⁸Wokhulupirira chuma chake adzafota, koma anthu a Mulungu adzaphukira ngati tsamba laliŵisi.

²⁹Wovutitsa a m'nyumba mwake adzaloŵa m'mavuto, chitsiru chidzasanduka kapolo wa munthu wanzeru.

³⁰Kukhala moyo wangwiro kumapezetsa moyo, koma kusatsata malamulo kumaononga moyo.

³¹Anthu abwino amalandira mphotho pa dziko lapansi, koma wochimwa ndi woipa mtima amalandira chilango.