Read Buku Loyera - Chichewa Miy. 12 Bible Online

Miy. 12 - Buku Loyera - Chichewa bible

Miy. 12

¹ Munthu wokonda mwambo amakonda kudziŵa zinthu, koma wodana ndi chidzudzulo ngwopusa.

²Munthu wabwino amapeza kuyanja pamaso pa Chauta, koma munthu wokonzekera zoipa, Chauta amamzenga mlandu.

³Munthu sakhazikika bwino pochita uchimo, koma maziko a munthu wochita zabwino sadzagwedezeka.

⁴Mkazi wabwino ali ngati chisoti chaulemu kwa mwamuna wake, koma mkazi wochititsa manyazi ali ngati chilonda chamafinya kwa mwamuna wake.

⁵Maganizo a munthu wabwino ngoongoka, koma malangizo a munthu woipa ngonyenga.

⁶Mau a munthu woipa mtima ngophetsa, koma mau a munthu wolungama ngopulumutsa anthu.

⁷Anthu oipa mtima amagwetsedwa, naiŵalika, koma banja la anthu omvera Mulungu silidzapasuka.

⁸Munthu amamuyamika malinga ndi nzeru zake, koma munthu wa mtima wokhota amanyozeka.

⁹Munthu wamba, wodzigwirira ntchito napeza zofunika, ali pabwino kuposa wongodzikuza, pamene alibe nchakudya chomwe.

¹⁰Munthu wolungama amasamalira moyo wa ziŵeto zake, koma munthu woipa mtima chifundo chake nchankhwidzi.

¹¹Wolima munda wake mwakhama amapeza chakudya chambiri, koma wotsata zopanda pake ngwopanda nzeru.

¹²Nsanja yolimba ya anthu oipa mtima imaonongeka, koma maziko a munthu wabwino ngosagwedezeka.

¹³Munthu woipa amakodwa mu msampha wa zoipa za pakamwa pake, koma munthu wochita zabwino amapulumuka ku zoipa.

¹⁴Munthu amalandira zabwino zambiri chifukwa cha mau ake abwino, ntchito zimene munthu amazichita ndi manja ake zimampindulira.

¹⁵Zimene amachita munthu wopusa mwiniwakeyo amaziyesa zolungama, koma munthu wanzeru amamvetsera malangizo a ena.

¹⁶Kukwiya kwa munthu wopusa kumadziŵika msanga, koma munthu wanzeru salabadako za chipongwe.

¹⁷Wolankhula zoona amapereka umboni woona, koma mboni yonama imalankhula monyenga.

¹⁸Wofulumira kulankhula, zonena zake zimalasa ngati mpeni, koma mau a munthu wanzeru amachiza anzake.

¹⁹Mau oona amakhala mpaka muyaya, koma zabodza sizikhalitsa.

²⁰Mumtima mwa anthu opangana zoipa mumakhala kunama, koma anthu olinga zabwino amakhala ndi chimwemwe.

²¹Munthu wabwino vuto silimgwera, koma woipa mavuto samchoka.

²²Pakamwa pabodza pamamnyansa Chauta. Koma anthu ochita zinthu mokhulupirika amamkondweretsa.

²³Munthu wochenjera amabisa nzeru zake, koma anthu opusa amaonetsa poyera kupusa kwao.

²⁴Ogwira ntchito mwakhama adzakhala olamulira, koma aulesi adzakhala akapolo.

²⁵Nkhaŵa ya munthu imakhala ngati katundu wolemera mumtima mwake, koma mau abwino amamsangalatsa.

²⁶Munthu wochita zabwino amatsogolera anzake pa njira yokhoza, koma njira ya munthu woipa imaŵasokeretsa.

²⁷Munthu waulesi sapeza zimene akukhumba, koma munthu wakhama amapeza chuma chamtengowapatali.

²⁸Njira ya chilungamo imafikitsa ku moyo, koma njira ya zoipa imafikitsa ku imfa.