Read Buku Loyera - Chichewa Miy. 13 Bible Online

Miy. 13 - Buku Loyera - Chichewa bible

Miy. 13

¹Mwana wanzeru amamvera malangizo a atate ake, koma wonyoza samvetsera akamamdzudzula.

²Munthu wabwino amapeza nako phindu kulankhula kwake, koma anthu onyenga amalakalaka zandeu.

³ Amene amagwira pakamwa pake amasunga moyo wake, koma amene amangolakatika amaonongeka.

⁴Munthu waulesi amakhumbira zinthu koma sapeza kanthu, m'menemo munthu wakhama amalemera.

⁵Munthu wokonda Mulungu amadana ndi bodza, koma zochita za munthu woipa zimanyansa ndipo zimachititsa manyazi.

⁶Chilungamo chimatchinjiriza munthu wabwino, koma tchimo limagwetsa munthu woipa.

⁷Wina amadziyesa wolemera, m'menemo alibe nkanthu komwe. Wina amadziyesa wosauka, m'menemo ali nchuma chochuluka.

⁸Chuma cha munthu wolemera nchimene chimaombola moyo wake, koma munthu wosauka alibe choti nkumuwombola.

⁹Kuŵala kwa anthu a Mulungu kumachita kuti ngwee, koma nyale ya anthu oipa mtima siidzalephera kuzima.

¹⁰Chipongwe cha osasamala za anzao chimadzetsa mkangano, koma omvera malangizo a anzao ndiwo ali ndi nzeru.

¹¹Chuma chochipeza mofulumira chidzanka chitha pang'onopang'ono, koma chochipeza pang'onopang'ono chidzanka chichulukirachulukira.

¹²Chinthu chochiyembekeza chikalephereka, chimafooketsa mtima, koma chinthu chochilakalaka chikachitikadi, chili ngati mtengo wopatsa moyo.

¹³Wonyoza malangizo amadziwononga, koma wosamala lamulo amalandira mphotho.

¹⁴Maphunzitso a anthu anzeru ali ngati kasupe wa moyo, amathandiza anthu kuti asakodwe mu msampha wa imfa.

¹⁵Munthu wa nzeru zabwino, anthu amamkomera mtima, koma munthu wosakhulupirika, kwake nkuwonongeka.

¹⁶Munthu wochenjera amachita zonse mwanzeru, koma wopusa amaonetsa poyera uchitsiru wake.

¹⁷Wamthenga woipa amagwetsa anthu m'mavuto, koma mtumwi wokhulupirika amadzetsa mtendere.

¹⁸Umphaŵi ndi manyazi zimagwera wonyozera mwambo, koma munthu womvera chidzudzulo amalemekezeka.

¹⁹Chinthu chochilakalaka chikachitikadi, chimasangalatsa mtima. Koma kuleka zoipa kuli ngati chinthu chonyansa kwa zitsiru.

²⁰ Woyenda ndi anthu anzeru nayenso amakhala ndi nzeru, koma woyenda ndi zitsiru adzaonongeka.

²¹Choipa chitsata mwini, koma wochita chilungamo amalandira zabwino.

²²Munthu wabwino amasiyira zidzukulu zake choloŵa, koma chuma cha munthu woipa amachilandira ndi anthu abwino.

²³M'tsala la munthu wosauka mumalola chakudya chambiri, koma anthu opanda chilungamo amalanda chakudyacho.

²⁴Amene sakwapula mwana wake, ndiye kuti samkonda, koma amene amakonda mwana wake, sazengereza kumlanga.

²⁵Munthu wabwino ali nazo zokwanira zoti adye nkukhuta, koma m'mimba mwa munthu woipa mumakhala pululu ndi njala.