Read Buku Loyera - Chichewa Miy. 14 Bible Online

Miy. 14 - Buku Loyera - Chichewa bible

Miy. 14

¹Mkazi wanzeru amamanga banja lake, koma wopusa amalipasula ndi zochita zake zomwe.

²Woyenda molungama amaopa Chauta, koma woyenda mokhotakhota amanyoza Chauta.

³Kulankhula kwa chitsiru kumamuitanira ndodo pa msana, koma mau a munthu wanzeru amamteteza.

⁴Kopanda ng'ombe, kumakhalanso kopanda dzinthu, koma kwa ng'ombe zamphamvu, dzinthu dzimachuluka.

⁵Mboni yokhulupirika siinama, koma mboni yonyenga imalankhula zabodza.

⁶Wonyoza anzake amafunafuna nzeru osaipeza, koma munthu womvetsa amadziŵa bwino zinthu msanga.

⁷Usayandikirepo pamene pali chitsiru, paja pamenepo supezapo mau anzeru.

⁸Nzeru za munthu wochenjera zagona pa kuzindikira bwino njira zake, koma zitsiru zimanyengedwa nkupusa kwao komwe.

⁹Zitsiru sizilabadako za kulapa machimo ao, kufuna kwabwino kumapezeka mwa anthu olungama.

¹⁰Mtima umadziŵa wokha zoŵaŵa zake, ndipo palibe wina angadziŵe kukondwa kwake.

¹¹Nyumba ya munthu woipa idzapasuka, koma hema la munthu wolungama lidzakhazikika.

¹² Pali njira ina yooneka ngati yabwino kwa munthu, koma kopherezera kwake nku imfa.

¹³Ngakhale poseka, mtima nkumvabe chisoni, ndipo mathero a chimwemwe ndi chisoni.

¹⁴Munthu wosalungama adzalandira zoyenerera ntchito zake, koma munthu wabwino adzalandira mphotho ya ntchito zake.

¹⁵Munthu wopusa amakhulupirira chilichonse, koma wochenjera amayang'ana m'mene akuyendera.

¹⁶Munthu wanzeru ngwochenjera, ndipo amalewa choipa, koma chitsiru chimadudukira zinthu mosasamalako.

¹⁷Munthu wopsa mtima msanga amachita zauchitsiru, wa khalidwe lonyenga, anthu amadana naye.

¹⁸Anthu opusa wao ndi uchitsiru, koma ochenjera yao ndi mphotho ya kudziŵa zinthu.

¹⁹Anthu ochimwa adzaŵeramira anthu abwino, anthu oipawo adzapempha thandizo kwa abwinowo.

²⁰Mmphaŵi ngakhale anzake omwe samukonda, koma wolemera amakhala ndi abwenzi ambiri.

²¹Amene amanyoza mnzake ngwochimwa, koma ngwodala amene amachitira chifundo amphaŵi.

²²Kodi amene amakonzekera zoipa sachimwa? Koma amene amakonzekera zabwino anthu amaŵaonetsa chifundo ndi kukhulupirika.

²³Pa ntchito iliyonse pali phindu lake, koma kumangolakatika kumabweretsa umphaŵi.

²⁴Mphotho ya anthu anzeru ndi nzeru zao zomwe, koma anthu opusa malipiro ao ndi uchitsiru wao.

²⁵Mboni yokhulupirika imapulumutsa anthu, koma mboni yonama imaphetsa.

²⁶Munthu woopa Chauta ali ndi chikhulupiriro cholimba, ndipo ana ake adzakhala napo pothaŵira.

²⁷Kuwopa Chauta ndiye kasupe wa moyo, kumapewetsa misampha ya imfa.

²⁸Chinamtindi cha anthu ndiye ulemerero wake wa mfumu, koma anthu akasoŵa, ufumu wake umasanduka wachabechabe.

²⁹Wosapsa mtima msanga amamvetsa zinthu kwambiri, koma wofulumira kupsa mtima amaonetsa uchitsiru wake.

³⁰Mtima wodekha umapatsa thupi moyo, koma nsanje imaoletsa mafupa.

³¹Wopondereza mmphaŵi, amachita chipongwe Mlengi wake, koma wochitira chifundo osauka, amalemekeza Mlengi wake.

³²Anthu ochita zoipa amatayika, koma ochita zabwino amatetezedwa.

³³Nzeru zimakhala mumtima mwa anthu omvetsa zinthu, koma mumtima mwa zitsiru sizipezeka.

³⁴Chilungamo chimakweza mtundu wa anthu, koma uchimo umachititsa manyazi mtundu uliwonse.

³⁵Mfumu imakondwa ndi mtumiki wochita zinthu mwanzeru, koma imakwiyira wochita zinthu mochititsa manyazi.