Read Buku Loyera - Chichewa Miy. 15 Bible Online

Miy. 15 - Buku Loyera - Chichewa bible

Miy. 15

¹Kuyankha kofatsa kumazimitsa mkwiyo, koma mau ozaza amakolezera ukali.

²Mau a anthu anzeru amapatsa nzeru, koma pakamwa pa opusa pamatulutsa zauchitsiru.

³Maso a Chauta ali ponseponse, amayang'ana oipa ndi abwino omwe.

⁴Mau ofatsa amakhala ngati mtengo wopatsa moyo, koma mau oipa amapweteka mtima.

⁵Chitsiru chimanyoza malangizo a bambo wake, koma wochenjera amamvera chidzudzulo.

⁶Munthu wochita chilungamo amakhala ndi chuma chambiri, koma zimene woipa amapindula zimamgwetsa m'mavuto.

⁷Pakamwa pa anthu anzeru pamafalitsa nzeru, koma mitima ya zitsiru siitero.

⁸Nsembe ya anthu oipa mtima imamuipira Chauta, koma pemphero la anthu olungama limamkondweretsa.

⁹Zochita za anthu oipa zimamnyansa Chauta, koma wochita zachilungamo Chauta amamkonda.

¹⁰Amene amasiya njira yabwino adzalangidwa koopsa. Amene amadana ndi kudzudzula adzafa.

¹¹Manda ndi chiwonongeko ndi zosabisika kwa Mulungu, nanji tsono mitima ya anthu!

¹²Wonyada sakonda kumdzudzula, sapitako kwa anthu anzeru.

¹³Mtima wosangalala umaonetsa nkhope yachimwemwe, koma mtima wachisoni umaphwanya moyo.

¹⁴Mtima wa munthu womvetsa zinthu umafunitsitsa ndithu kudziŵa zambiri, koma m'kamwa mwa anthu opusa zauchitsiru zili pha!

¹⁵Munthu wozunzika masiku ake onse amakhala oipa, koma mtima wachimwemwe umakhala pa chisangalalo nthaŵi zonse.

¹⁶Kuli bwino kukhala ndi zinthu pang'ono nkumaopa Chauta, kupambana kukhala ndi chuma chambiri nkupeza nacho mavuto.

¹⁷Kuli bwino kudyera masamba pali chikondi, kupambana kudyera nyama ya ng'ombe yonenepa pali chidani.

¹⁸Munthu wopsa mtima msanga amautsa mkangano, koma munthu woleza mtima amabweretsa mtendere.

¹⁹Njira ya munthu waulesi ndi yoŵirira ndi minga, koma njira ya munthu wolungama imakhala ngati mseu wosalala.

²⁰Mwana wanzeru amakondweretsa atate ake, koma mwana wopusa amanyoza amai ake.

²¹Uchitsiru umakondweretsa munthu wopanda nzeru, koma munthu womvetsa zinthu amatsata zolungama.

²²Popanda uphungu zolinga zako zimalakwika, koma aphungu akachuluka, zolinga zako zimathekadi.

²³Kuyankha mokhoza kumakondwetsa munthu, ndipo mau onena pa nthaŵi yake amakoma.

²⁴Njira yopita ku moyo imakamufikitsa ku ntchito zangwiro, kuti alewe malo a anthu akufa kunsiko.

²⁵Chauta amapasula nyumba ya munthu wonyada, koma amasamalira kadziko ka mkazi wamasiye.

²⁶Maganizo a anthu oipa amamnyansa Chauta, koma mau a anthu olungama amamkondweretsa.

²⁷Munthu wofunafuna phindu monyenga amavutitsa banja lake, koma munthu wodana ndi ziphuphu adzapeza bwino.

²⁸Munthu wabwino amaganizira za m'mene ayankhire, koma pakamwa pa munthu woipa pamatuluka mau oipa okhaokha.

²⁹Chauta amakhala kutali ndi anthu oipa mtima, koma amamva pemphero la anthu achilungamo.

³⁰Maso okondwa amasangalatsa mtima, ndipo uthenga wabwino umalimbitsa munthu.

³¹Amene makutu ake amalandira bwino kudzudzula koyenera, adzakhala m'gulu la anthu anzeru.

³²Munthu wonyoza malangizo amangodzinyoza yekha, koma wovomera kudzudzula amapindula nzeru yomvetsa zinthu.

³³Kuwopa Chauta kumaphunzitsa nzeru, ndipo ndi kudzichepetsa ndi ulemu, chili patsogolo nkudzichepetsa.