Read Buku Loyera - Chichewa Miy. 16 Bible Online

Miy. 16 - Buku Loyera - Chichewa bible

Miy. 16

¹Zolinga zamumtima ndi za munthu, koma zolankhula zake ndi zochokera kwa Chauta.

²Ntchito zake za munthu zimakhala zolungama pamaso pake, koma Chauta amaweruza zamumtima.

³Uike ntchito zako m'manja mwa Chauta, ndipo zolinga zako zidzachitikadi.

⁴Chauta adapanga chinthu chilichonse kuti chikhale ndi cholinga chake, ngakhale anthu oipa, kuti aone tsiku la mavuto.

⁵Munthu aliyense wodzikuza amanyansa Chauta, ndithu ameneyo sadzalephera kulangidwa.

⁶ Chifukwa cha kudzipereka ndi kukhulupirika, munthu amakhululukidwa machimo ake. Chifukwa choopa Chauta munthu amalewa zoipa.

⁷Pamene makhalidwe a munthu akondweretsa Chauta, ngakhale adani ake omwe amakhala naye mwamtendere.

⁸ Kuli bwino kukhala ndi zinthu pang'ono uli ndi chilungamo kupambana kukhala ndi chuma chambirimbiri ulibe chilungamo.

⁹Mtima wa munthu umalingalira zoti uchite, koma Chauta ndiye amene amaongolera mayendedwe a munthuyo.

¹⁰M'kamwa mwa mfumu mumatuluka chigamulo chochokera kwa Mulungu. Pakamwa pa mfumu sipalakwa pogamula mlandu.

¹¹Ndi Chauta amene amafuna kuti miyeso ndi masikelo zikhale zachilungamo. Miyala yonse yoyesera yam'thumba adaipanga ndi Chauta.

¹²Kuchita zoipa kumanyansa mafumu, pakuti chilungamo ndiye maziko a ufumu wao.

¹³Mau oona amakondweretsa mfumu, ndipo imamkonda munthu wolankhula chilungamo.

¹⁴Mfumu ikakwiya, ndiye kuti imfa ili pafupi, koma munthu wanzeru amaupepesa mkwiyowo.

¹⁵Kukoma mtima kwa mfumu kumadzetsa moyo, kuli ngati mitambo ya mvula yam'chilimwe.

¹⁶Kupata nzeru kumapambana kupata golide. Kumvetsa zinthu nkwabwino, kumapambana kukhala ndi siliva.

¹⁷Mseu wa munthu wolungama umapewa zoipa. Munthu wopenyetsetsa kumene akupita amasunga moyo wake.

¹⁸Kunyada kumafikitsa ku chiwonongeko, ndipo munthu wa mtima wodzikuza adzagwa.

¹⁹Kuli bwino kukhala ndi mtima wodzichepetsa pakati pa anthu osauka, kupambana kumagaŵana chuma ndi anthu onyada.

²⁰Munthu wovomera malangizo, zinthu zidzamuyendera bwino, ndi wodala amene amadalira Chauta.

²¹Wa mtima wanzeru amamutcha wozindikira bwino zinthu, kulankhula kwake kokometsera kumakulitsa mphamvu ya mau ake.

²²Nzeru ndi kasupe wopatsa moyo kwa amene ali nazo, koma uchitsiru umabweretsa chilango kwa anthu opusa.

²³Mtima wa munthu wanzeru umamlankhulitsa mau ochenjera, nzeruzo zimakulitsa mphamvu ya mau ake.

²⁴Mau okometsera ali ngati chisa cha uchi, amakoma mu mtima ndipo amalimbitsa thupi.

²⁵ Pamakhala njira ina yooneka yowongoka kwa munthu, koma kumapeto kwake imakhala njira ya ku imfa.

²⁶Njala ya munthu wantchito imamthandiza kulimbikira, ndi njalayo imene imamkakamiza kuchita kanthu.

²⁷Munthu wopandapake amakonzekera kuchita zoipa, mau ake ali ngati moto wopsereza.

²⁸ Munthu woipa mtima amafalitsa mkangano, kazitape amadanitsa anthu okhala pa chibwenzibwenzi.

²⁹Munthu wandeu amakopa mnzake, ndipo amamuyendetsa m'njira yoipa.

³⁰Amene amatsinzinira masoŵa, amalingalira zinthu zokhota, amene amachita msunamo amadzetsa zoipa.

³¹Imvi zili ngati chisoti chaufumu chopatsa ulemerero, munthu amazipata akakhala ndi moyo wautali.

³²Munthu wosapsa mtima msanga amapambana wankhondo, amene amadzigwira mtima amapambana msilikali wogonjetsa mzinda.

³³Maere amaŵaponya m'funkha, koma amene amaulula ndi Chauta.