Read Buku Loyera - Chichewa Miy. 17 Bible Online

Miy. 17 - Buku Loyera - Chichewa bible

Miy. 17

¹Kuli bwino kudya mkute wouma pali bata, kuposa kuchita madyerero m'nyumba m'mene muli mikangano.

²Kapolo wochita zinthu mwanzeru adzalamula mwana wa mfulu wochita zamanyazi, kapoloyo adzagaŵana nawo choloŵa ngati mmodzi mwa abale.

³Siliva amamuyesera m'chitofu, golide amamuyesera m'ng'anjo, koma mitima amaiyesa ndi Chauta.

⁴Wochita zoipa amamvera malangizo oipa, wabodza amamvera zochoka m'kamwa monyenga.

⁵Amene amalalatira mmphaŵi, amanyoza Mlengi wake. Amene amakondwerera tsoka la mnzake adzalangidwa.

⁶Zidzukulu ndiye ulemu wa anthu okalamba, ulemerero wa ana ndi atate ao.

⁷Kulankhula kwabwino sikuyenerana ndi chitsiru. Nanji kulankhula kwabodza, kodi kungayenerane ndi mfumu?

⁸Chiphuphu chili ngati mankhwala amwai kwa wochiperekayo, kulikonse kumene amapita, amalemera.

⁹Wokhululukira cholakwa amafunafuna chikondi, koma wosunga nkhani kukhosi amapha chibwenzi.

¹⁰Munthu wanzeru amamva kamodzi, munthu wopanda nzeru ndi samvamkunkhu.

¹¹Munthu woipa mtima amangofuna zoukira. Tsono adzamtumira wamthenga wankhalwe.

¹²Kuli bwino kukumana ndi chimbalangondo cholandidwa ana, kupambana kukumana ndi chitsiru mu uchitsiru wake.

¹³Munthu akamabwezera zoipa kwa zabwino, tsoka silidzachoka pabanja pake.

¹⁴Chiyambi cha mkangano chili ngati kukhamulira madzi, ndiye uzichokapo ndeu isanabuke.

¹⁵Woweruza munthu woipa mtima kuti ndi wosalakwa, amanyansa Chauta, nayenso wopasa mlandu munthu wosalakwa amaipira Chauta.

¹⁶M'manja mwa wopusa mungakhalirenji ndalama zogulira nzeru, chikhalirecho mutu wake suyenda bwino?

¹⁷ Bwenzi lako ndiye amakukonda nthaŵi zonse, ndipo mbale wako adabadwira kuti azikuthandiza pa mavuto.

¹⁸Munthu wopanda nzeru amapereka chikole, ndipo amasanduka chigwiriro pamaso pa mnzake.

¹⁹Wokonda zolakwa amakonda mkangano. Wokonda kulankhula zonyada amadziitanira chiwonongeko.

²⁰Munthu wa mtima woipa zake sizimuyendera bwino. Ndipo wa pakamwa ponena zoipa amagwa m'tsoka.

²¹Mwana wopusa amamvetsa chisoni atate ake, bambo wake wa chitsiru sakhala ndi chimwemwe.

²²Mtima wosangalala umakhala ngati mankhwala abwino, koma mtima woziya umaumitsa thupi.

²³Munthu woipa amalandira chiphuphu cham'seri, ndipo amapotoza chigamulo cha mlandu.

²⁴Munthu wanzeru amaika mtima pa nzeru, koma chitsiru chimangoti maso mwalamwala pa dziko lonse.

²⁵Mwana wopusa amamvetsa chisoni atate ake, ndipo amapweteka mtima wa amai ake amene adambala.

²⁶Kulipitsa munthu wosalakwa nkoipa. Si chilungamo kukwapula anthu abwino.

²⁷Munthu wosunga pakamwa ndiye wodziŵa zinthu, munthu wodekha mtima ndiye womvetsa zinthu.

²⁸ Nchitsiru chomwe chikakhala chete, chimakhala ngati munthu wanzeru. Chikasunga pakamwa chimakhala ngati munthu wochenjera.