Read Buku Loyera - Chichewa Miy. 18 Bible Online

Miy. 18 - Buku Loyera - Chichewa bible

Miy. 18

¹Munthu wodzipatula mwa anzake amangotsata zomkomera iyeyo, amangofuna kutsutsana ndi zimene onse akudziŵa kuti ndi zoona.

²Chitsiru sichisamalako za kumvetsa zinthu. Koma chimangolankhula za maganizo ake okha.

³Kuipa mtima kukaoneka, pamabweranso manyozo, kunyozeka kumaitana manyazi.

⁴Mau a munthu angathe kukhala kasupe wa nzeru, ozama ngati nyanja yamchere yaikulu, omweka ngati a mu mtsinje wothamanga.

⁵Si kwabwino pa mlandu kukondera munthu woipa, kapena kupondereza munthu wosalakwa.

⁶Mau a chitsiru amautsa mkangano, ndipo pakamwa pake pamaitana mkwapulo.

⁷Pakamwa pa chitsiru ndipo pamabweretsa chiwonongeko chake. Mau ake ali ngati msampha wodzikolera mwiniwakeyo.

⁸Mau a kazitape ali ngati chakudya chokoma, anthu amaŵameza onse mokondwa.

⁹Wogwira ntchito yake mwaulesi, ali pachibale ndi munthu woononga zinthu.

¹⁰Chauta ali ngati nsanja yolimba, munthu wokhulupirira amathaŵiramo napulumuka.

¹¹Chuma cha munthu wolemera chili ngati mzinda wake wolimba, chili ngati linga lalitali limene amayesa ndi lomutchinjiriza.

¹²Chiwonongeko chisanafike, mtima wa munthu umadzikuza, koma ulemu umatsatira kudzichepetsa.

¹³ Ukayankha usanamve nkhani yonse, umaoneka wopusa ndipo umachita manyazi.

¹⁴Mtima wa munthu umatha kupirira matenda, koma munthu akataya mtima, ndani angathe kumlimbitsanso?

¹⁵Munthu wochenjera amafuna kuphunzirabe zambiri, amafunitsitsa kudziŵa bwino zinthu.

¹⁶Mphatso ya munthu imakhala ngati konza kapansi, imatha kumfikitsa pamaso pa akuluakulu.

¹⁷Amene amayamba kufotokoza mlandu wake amaoneka ngati wokhoza ndiye, mpaka mnzake atabwera nadzamufunsitsa bwino.

¹⁸Maere amathetsa mikangano. Amalekanitsa okangana amphamvu.

¹⁹Mnzako ukamthandiza amakhala ngati mzinda wolimba, koma kukangana naye kumakutsekera thandizo lililonse.

²⁰Munthu amapeza bwino kapena ai, malinga ndi zolankhula zake, amalandira zotsatira za mau a pakamwa pake.

²¹Zimene umanena zingathe kukuphetsa kapena kukukhalitsa moyo, munthu wolankhulalankhula adzapeza bwino kapena tsoka.

²² Wopeza mkazi, wapeza chinthu chabwino, Chauta wamukomera mtima.

²³Anthu osauka amapemba, koma anthu olemera amayankha mwaukali.

²⁴Pali abwenzi ena amene chibwenzi chao nchachiphamaso chabe, koma pali ena amene amakukangamira koposa mbale yemwe.