Read Buku Loyera - Chichewa Miy. 19 Bible Online

Miy. 19 - Buku Loyera - Chichewa bible

Miy. 19

¹Wosauka amene amayenda molungama amaposa munthu wopusa wolankhula zokhota.

²Si bwino kuti munthu akhale wosadziŵa zinthu, ndipo munthu woyenda mofulumira dziŵi amasokera.

³Kupusa kwake kwa munthu kukamgwetsa m'chiwonongeko, mtima wake umadzakwiyira Chauta.

⁴Chuma chimachulukitsa abwenzi atsopano, koma wosauka abwenzi ake amamthaŵa.

⁵Mboni yonama sidzalephera kulangidwa, wolankhula mabodza sadzapulumuka.

⁶Ambiri amafuna kuti munthu wopata aŵakomere mtima, munthu wooloŵa manja amakhala bwenzi la anthu onse.

⁷Ngati munthu wosauka abale ake omwe amadana naye, nanji abwenzi ake tsono! Iwo ndiye adzamthaŵira kunka kutali. Amayesetsa kuŵalondola mopembedzera, koma osaŵathanso.

⁸Amene amakonda nzeru amadzichitira zabwino mwiniwakeyo. Amene ali womvetsa, zinthu zidzamuyendera bwino.

⁹Mboni yonama sidzalephera kulangidwa, wolankhula mabodza adzaonongeka.

¹⁰Nkosayenera kuti chitsiru chizikhala ndi moyo wachuma, nanjinso kuti kapolo azilamulira akalonga!

¹¹Nzeru zimapatsa munthu mtima wosakwiya msanga, ulemerero wake wagona pa kusalabadako za chipongwe.

¹²Mkwiyo wa mfumu uli ngati kubangula kwa mkango, koma kukoma mtima kwake kuli ngati mame pa udzu.

¹³Mwana wopusa ndi tsoka kwa atate ake, mkazi wolongolola ndi wotopetsa ngati mvula ya mvumbi.

¹⁴Nyumba ndi chuma ndiye choloŵa chochokera kwa makolo, koma mkazi wanzeru ndi wochokera kwa Chauta.

¹⁵Ulesi umagonetsa tulo tofa nato, choncho munthu waulesi adzavutika ndi njala.

¹⁶Munthu womvera malamulo amadzisungira moyo, koma munthu wonyoza malangizo a Mulungu adzafa.

¹⁷Wokomera mtima anthu osauka amachita ngati wokongoza Chauta, ndipo ndi Chautayo amene adzambwezera chifukwa cha ntchito zake.

¹⁸Uzimlanga mwana wako chikhulupiriro chikadalipo, ukapanda kutero, wamuwononga.

¹⁹Munthu wa ukali woopsa adzalandira chilango chomuyenerera, pakuti ukamlekerera wotereyu, zidzaipa koposa kale.

²⁰Uzimvera malangizo ndi kuvomera mwambo, kuti ukhale ndi nzeru m'tsogolo.

²¹Munthu mumtima mwake amakonzekera zambiri, koma cholinga cha Chauta ndiye chimene chidzachitike.

²²Chofunika kwa munthu nkukhulupirika. Kukhala wosauka nkwabwino koposa kukhala wonama.

²³Kuwopa Chauta kumabweretsa moyo, ndipo amene amaopayo amakhala pabwino, ndiye kuti choipa sichidzamgwera.

²⁴Waulesi amati akapisa dzanja m'mbale, kumamtopetsa kuti alifikitse kukamwa kwake.

²⁵Ukamenya munthu wonyoza anzake, adzachenjererapo. Ukadzudzula munthu womvetsa bwino zinthu, adzapindulapo nzeru.

²⁶Amene amachita ndeu ndi atate ake ndi kupirikitsa amai ake, ameneyo ndi mwana wochititsa manyazi ndiponso wonyozetsa.

²⁷Mwana wanga, ukaleka kumvera malangizo, udzapatukana ndi mau opatsa nzeru.

²⁸Mboni yachabe imanyoza chilungamo, pakamwa pa anthu oipa pamalikwira tchimo.

²⁹Zakonzeka kale kuti mlandu uŵagwere anthu onyoza, mkwapulo ndi wokonzakonza kuti akwapulire pamsana pa zitsiru.