Read Buku Loyera - Chichewa Miy. 2 Bible Online

Miy. 2 - Buku Loyera - Chichewa bible

Miy. 2

¹Mwana wanga, uvomere mau anga, ndi kusunga bwino malamulo anga.

²Uzitchera khutu ku nzeru, uziikapo mtima pa kumvetsa zinthu.

³Ndikutitu upemphe mtima wozindikira zinthu, ndi kupemba kuti ukhale womvetsa zinthu.

⁴Uziifunafuna nzeruyo ngati siliva, ndi kumaiwunguza ngati chuma chobisika.

⁵Ukatero, udzamvetsa za kuwopa Chauta, udzapeza nzeru za kudziŵa Mulungu.

⁶ Paja Chauta ndiye amapatsa nzeru, Iye ndiye kasupe wa kudziŵa zinthu ndi wa kumvetsa.

⁷Amasungira anthu olungama nzeru zenizeni, ali ngati chishango choteteza oyenda mwaungwiro.

⁸Ndiye mlonda wa njira zolungama, amatchinjiriza njira ya anthu ake oyera mtima.

⁹Motero udzamvetsa za ungwiro ndi chilungamo, za kusakondera, ndi za njira iliyonse yabwino.

¹⁰Nzeru zidzaloŵa mumtima mwako, kudziŵa zinthu kudzakusangalatsa.

¹¹Kuganiziratu zam'tsogolo kudzakusunga, kumvetsa zinthu kudzakuteteza.

¹²Nzeruyo idzakupulumutsa ku mayendedwe oipa, idzakuteteza kwa amtherakuŵiri,

¹³amene amasiya njira zolungama, namayenda m'njira zamdima.

¹⁴Iwoŵa amakondwa pochita zoipa, amasangalala ndi ntchito zosalungama.

¹⁵Anthu ameneŵa njira zao nzokhotakhota, makhalidwe ao ngonyenga.

¹⁶Udzapulumuka kwa mkazi wadama, kwa mkazi wachiwerewere wolankhula mau oshashalika,

¹⁷amene amasiya mwamuna wake wapaumbeta, kuiŵala chipangano chochita ndi Mulungu wake.

¹⁸Pakuti nyumba yake imatsenderekera ku imfa, njira zake zimamufikitsa kwa anthu akufa.

¹⁹Opita kwa iye, palibe ndi mmodzi yemwe wobwerako, sazipezanso njira zopita ku moyo.

²⁰Ndiye iwe, uzitsata njira za anthu abwino, uziyenda m'njira za anthu ochita chilungamo.

²¹Paja anthu olungama ndiwo adzakhale m'dziko, anthu okhulupirika ndiwo adzakhazikike m'menemo.

²²Koma anthu oipa Mulungu adzaŵachotsa pa dziko, anthu onyenga adzaŵatulutsa m'dzikomo.