Read Buku Loyera - Chichewa Miy. 20 Bible Online

Miy. 20 - Buku Loyera - Chichewa bible

Miy. 20

¹Anthu okhuta vinyo amanyodola anzao, omwa zaukali amautsa phokoso. Aliyense wosokera nazo zimenezi ndi wopanda nzeru.

²Mkwiyo woopsa wa mfumu uli ngati kubangula kwa mkango. Amene amauputa dala mkwiyowo, amataya moyo wake.

³Nchaulemu kwa munthu kumalewa mikangano, koma aliyense wopusa amakonda kulongolola.

⁴Waulesi sasoseratu pa nthaŵi yoyenera. Pa nthaŵi yokolola adzafunafuna dzinthu, koma sadzapeza kanthu.

⁵Zolinga za mtima wa munthu zili ngati madzi ozama, ndi munthu wanzeru yekha angazitulutse.

⁶Anthu ambiri amalankhula za kukhulupirika kwao, koma ndani angathe kumpeza munthu wokhulupirika kwenikweni?

⁷Munthu abwino amakhala mwachilungamo, ndipo Mulungu amadalitsa ana amene amatsata njira yake.

⁸Pamene mfumu ikhala pa mpando wake wa chiweruzo, imazindikira ndi maso chabe anthu onse amene ali oipa.

⁹Ndani angathe kunena kuti, “Ine ndauyeretsa mtima wanga, ndilibenso tchimo lililonse.”

¹⁰Masikelo ndi miyeso ina yoyesera zinthu zikakhala zonyenga, zonsezo zimamunyansa Chauta.

¹¹Ngakhale mwana yemwe amadziŵika ndi ntchito zake, kuti zimene amachitazo ndi zabwino ndi zolungama.

¹²Makutu amene timamvera ndiponso maso amene timapenyera, zonsezo adazilenga ndi Chauta.

¹³Usakondetse tulo, kuwopa kuti ungagwe mu umphaŵi. Khala maso, ndipo udzakhala ndi chakudya chambiri.

¹⁴Munthu akamagula kumene chinthu amati, “Nchoipa, nchoipa,” koma atagula nkuchokapo, amayamba kudzitama.

¹⁵Pali golide ndi miyala yambirimbiri yamtengowapatali, koma mau olankhula zanzeru ali ndi mtengo woposa zonsezo.

¹⁶Munthu amene waperekera mlendo chikole, umlande chovala chake, chimenecho chikhale chigwiriro chako, chifukwa chakuti waperekera chikole mlendo wosadziŵika.

¹⁷Chakudya chochipeza monyenga chimamkomera munthu, koma pambuyo pake chimakasanduka ngati lubwe m'kamwa mwake.

¹⁸Ukakonzekera kuchita zinthu, uziyamba wafunsa. Usanamenye nkhondo, uyambe wapempha malangizo oyenera.

¹⁹Amene amanka nachita ugogodi, amaulula zinsinsi. Nchifukwa chake usamagwirizane naye wolankhula zopusayo.

²⁰Wina akatemberera bambo wake kapena mai wake, moyo wake udzatha ngati nyale yozima mu mdima wandiweyani.

²¹Choloŵa chopata mofulumira poyamba, sichidzakhala dalitso pambuyo pake.

²²Usamanena kuti, “Ndidzabwezera choipa ndine.” Udikire Chauta, ndipo adzakuthandiza.

²³Miyeso yosintha imanyansa Chauta, masikelo onyenga ndi oipanso.

²⁴Mayendedwe a munthu amaŵalamula ndi Chauta: Tsono munthu angadziŵe bwanji njira yake?

²⁵Ndi msampha kwa munthu kupereka chinthu kwa Chauta mosaganiza bwino, chifukwa mwina atha kusintha maganizo atalumbira kale.

²⁶Mfumu yanzeru imazindikira oipa, ndipo imaŵalanga mopanda chisoni.

²⁷Mpweya wa munthu uli ngati nyale ya Chauta, nyaleyo imafufuza ziwalo zake zonse zam'kati.

²⁸Kukoma mtima ndi kukhulupirika ndizo zimasunga mfumu, chilungamo ndiye chimalimbitsa ufumu wake.

²⁹Kukongola kwa achinyamata kwagona pa nyonga zao, koma ulemerero wa nkhalamba wagona pa imvi zao.

³⁰Mikwingwirima ndiye mankhwala ochotsa zoipa. Mikwapulo imachiza zam'katikati mwa munthu.