Read Buku Loyera - Chichewa Miy. 21 Bible Online

Miy. 21 - Buku Loyera - Chichewa bible

Miy. 21

¹Mtima wa mfumu uli ngati mtsinje wa madzi m'manja mwa Chauta. Amauwongolera ku zimene Iyeyo akufuna.

²Makhalidwe a munthu amakhala olungama pamaso pa mwiniwakeyo, koma Chauta ndiye amayesa mtima wake.

³Kuchita zolungama ndi zokhulupirika kumakondweretsa Chauta koposa kupereka nsembe.

⁴Maso odzikuza ndi mtima wonyada zimatsogolera anthu oipa ngati nyale, nchifukwa chake amachimwa.

⁵Zolinga za munthu wakhama zimachulukitsa dzinthu dzake, koma aliyense wochita zinthu mofulumira udyo, amangokhala wosoŵa.

⁶Chuma chomachipeza monyenga chimangoti wuzi ngati nthunzi, ndipo chimakola anthu mu msampha wa imfa.

⁷Ndeu za anthu oipa zidzaŵaononga, poti amakana kuchita zolungama.

⁸Njira ya munthu woipa ndi yokhotakhota, koma khalidwe la munthu wosachimwa ndi lolungama.

⁹Kuli bwino kukhala potero pa denga kupambana kukhala m'nyumba pamodzi ndi mkazi wolongolola.

¹⁰Mtima wa munthu woipa umalakalaka zoipa. Samva chifundo konse ndi mnzake wovutika.

¹¹Munthu wonyoza akalangidwa, wopusapusa amaphunzirapo nzeru. Munthu wanzeru akamlangiza, amamvetsa zambiri.

¹²Mulungu ngwachilungamo nthaŵi zonse, amadziŵa zimene anthu oipa akuchita ndipo adzawaononga.

¹³Amene amatseka m'khutu wosauka akamalira, adzalira iyenso, koma kulira kwakeko sikudzamveka.

¹⁴Mphatso yam'seri imaposa ukali, ndipo chiphuphu chosereza chimathetsa mphamvu ngakhale ya mkwiyo woopsa.

¹⁵Chilungamo chikachitika, nzika zabwino zimakondwera, koma zimadederetsa atambwali.

¹⁶Munthu amene amasiya njira ya anthu anzeru, adzapezeka m'gulu la anthu akufa.

¹⁷Amene amakondetsa zosangalatsa, adzasanduka munthu wosauka. Amene amakondetsa vinyo ndi mafuta, sadzalemera.

¹⁸Oipa adzakhala choombolera anthu abwino, ndipo osakhulupirika adzakhala choombolera anthu a mtima wabwino.

¹⁹Kuli bwino kukhala ku chipululu kupambana kukhala ndi mkazi wolongolola ndi wopsa mtima msanga.

²⁰Munthu wanzeru samwaza chuma chake, koma munthu wopusa amachiwononga.

²¹Amene amatsata chilungamo ndi chifundo adzapeza moyo ndi ulemu.

²²Munthu wanzeru amagonjetsa mzinda wa anthu a mphamvu, ndipo amagwetsa linga lamphamvu limene anthuwo ankalikhulupirira.

²³Amene amagwira pakamwa ndi kusamala zokamba zake, sapeza mavuto.

²⁴Munthu wonyada ndi wodzikuza amamtchula “Mnyodoli,” chifukwa amachita zinthu modzitama ndi mwachipongwe.

²⁵Kulakalaka kwa munthu waulesi kumamupha, poti amangokhala manja ali khoba, osagwira ntchito.

²⁶Tsiku lathunthu anthu oipa amasirira zinthu, koma omvera Mulungu amapatsa ndipo alibe kaliwumira.

²⁷ Nsembe ya anthu oipa imamnyansa Chauta, nanji tsono akaipereka ndi cholinga choipa!

²⁸Mboni yonama idzaonongeka, koma mau a munthu wakumva adzamveka nthaŵi zonse.

²⁹Munthu woipa amafuna kuwoneka wolimba mtima, koma munthu woongoka amaganizira bwino zochita zake.

³⁰Palibe nzeru, palibe kumvetsa zinthu, palibe ngakhale uphungu, zimene zingathe kupambana Chauta.

³¹Kavalo amamkonzera tsiku la nkhondo, koma ndi Chauta amene amapambanitsa.