Read Buku Loyera - Chichewa Miy. 22 Bible Online

Miy. 22 - Buku Loyera - Chichewa bible

Miy. 22

¹Mbiri yabwino ndi yofunika kupambana chuma chambiri, kupeza kuyanja nkopambana siliva ndi golide.

²Wolemera ndi wosauka akulingana, pakuti onsewo adaŵalenga ndi Chauta.

³Munthu wochenjera akaona choopsa amabisala, koma wopusa amangopitirira ndipo amanong'oneza bondo.

⁴Mphotho ya munthu wodzichepetsa ndi woopa Chauta, ndi chuma, ulemu ndi moyo.

⁵M'njira ya munthu wosalungama muli minga ndi misampha, koma wodzisamala bwino adzazilewa zonsezo.

⁶ Mwana muzimuphunzitsa njira yoti aziyendamo, ndipo atakalamba sadzachokamo m'njira imeneyo.

⁷Wolemera amalamulira wosauka, ndipo wokongola zinthu amakhala kapolo wa womkongozayo.

⁸Amene amabzala kusalungama adzakolola mavuto, ndipo ndodo ya ukali wake idzathyoka.

⁹Amene ali ndi diso lachifundo adzadalitsidwa, poti amagaŵana chakudya chake ndi anthu osauka.

¹⁰Mukampirikitsa wonyoza, kukangana kudzatha, ndipo ndeu ndi zonyoza zidzalekeka.

¹¹Amene amakonda kukhala woyera mtima ndi kulankhula zabwino, adzakhala bwenzi la mfumu.

¹²Chauta amayang'anira bwino anthu odziŵa zinthu, koma mau a anthu osakhulupirika, Iye amaŵalepheretsa.

¹³Waulesi amati, “Pali mkango pabwalopo! Ndikaphedwa m'miseu.”

¹⁴Pakamwa pa mkazi wachigololo pali ngati dzenje lakuya. Amene Chauta amamkwiyira adzagwamo.

¹⁵Kupusa kumakhala mumtima mwa mwana, koma ndodo yomlangira mwanayo idzachotsa kupusako.

¹⁶Amene amapondereza osauka kuti aonjezere pa chuma chake, kapena amene amangopatsa zinthu olemera okha, adzasanduka wosauka.

¹⁷Utchere khutu lako, umve mau a anthu anzeru, uike mtima wako pa zophunzitsa zanga, kuti uzidziŵe.

¹⁸Chidzakhala chokondwetsa ukazisunga, ndi kukhala wokonzeka kumazilankhula pa nthaŵi yake.

¹⁹Ndakudziŵitsa zimenezi lero kuti makamaka iweyo uzikhulupirira Chauta.

²⁰Kodi suja ndidakulembera malangizo makumi atatu, okuchenjeza ndi okupatsa nzeru,

²¹malangizo okudziŵitsa zolungama ndi zoona, kuti ukaŵayankhe zoona amene adakutuma?

²²Mmphaŵi usamubere, chifukwa choti iyeyo ndi wosauka. Anthu ozunzika usaŵapondereze pa bwalo la milandu.

²³Pakuti Chauta adzaŵateteza pa mlandu wao, ndipo adzaŵalanda moyo amene amalanda zinthu zao.

²⁴Usachite naye chibwenzi munthu wopsa mtima msanga, ndipo usamayenda naye munthu waukali,

²⁵kuwopa kuti ungadzaphunzireko mayendedwe ake, ndi kukodwa mu msampha.

²⁶Usakhale mmodzi mwa anthu opereka zikole, amene amasanduka chigwiriro cha ngongole.

²⁷Ngati ulephera kulipira, adzakulanda ngakhale bedi lako lomwe.

²⁸Usasendeze malire akalekale amene makolo ako adaŵaika.

²⁹Kodi ukumuwona munthu wochita ntchito zake mwaluso? Iye adzatumikira mafumu, sadzatumikira anthu wamba.