Read Buku Loyera - Chichewa Miy. 23 Bible Online

Miy. 23 - Buku Loyera - Chichewa bible

Miy. 23

¹Ukakhala pansi kuti udye ndi mfumu, uyang'ane bwino zimene zili pamaso pako.

²Ngati ndiwe munthu wadyera, udziletse kuti usachite khwinthi.

³Usasirire zakudya zake zokoma, poti zimenezi ndi zakudya zonyenga.

⁴Usadzitopetse nkufuna chuma, udziŵe kuchita zinthu mwanzeru ndi kudziletsa.

⁵Ukangopeza chuma, uwona chapita kale, pakuti chimachita ngati chamera mapiko mwadzidzidzi, nkuyamba kuuluka kunka kumwamba ngati chiwombankhanga.

⁶Usadye chakudya kwa munthu waunkhambo, usamalakalaka zakudya zake zokoma.

⁷Paja iye amangokhalira kuganiza za mtengo wa zinthu. Amakuuza kuti, “Kazidya, kazimwa!” Koma mumtima mwake zimenezo sakuzifuna.

⁸Udzasanza nthongo wadyazo, ndipo mau ako oshashalika adzapita pachabe.

⁹Usamalankhula pali munthu wopusa, pakuti adzanyoza mau ako anzeru.

¹⁰Usasendeza malire akalekale, kapena kukaloŵerera minda ya ana amasiye.

¹¹Paja Momboli wao ndi wamphamvu, adzaŵateteza pa mlandu wao kuti akutsutse iweyo.

¹²Mtima wako ukhale pa malangizo, ndipo makutu ako azimvetsera mau anzeru.

¹³Usamaleka kumpatsa mwambo mwana, ukamkwapula ndi tsatsa sadzafa.

¹⁴Ngati umkwapula ndi tsatsa, udzapulumutsa moyo wake ku imfa.

¹⁵Mwana wanga, mtima wako ukakhala wanzeru, nanenso mtima wanga udzasangalala.

¹⁶Mtima wanga udzakondwa ndikadzakumva ukulankhula zolungama.

¹⁷Mtima wako usamachita nsanje ndi anthu ochimwa, koma upitirire kumaopa Chauta tsiku ndi tsiku.

¹⁸Ndithu, zakutsogolo zilipo, ndipo chikhulupiriro chako sichidzakhala chachabe.

¹⁹Mwana wanga, tamvera, ndipo ukhale wanzeru, mtima wako uuyendetse m'njira yabwino.

²⁰Usakhale pakati pa anthu amene amaledzera, kapena pakati pa anthu odya nyama mwadyera.

²¹Paja chidakwa ndi munthu wadyera adzasanduka amphaŵi, ndipo munthu waulesi adzasanduka mvalansanza.

²²Umvere atate ako amene adakubala, ndipo usamanyoza amai ako atakalamba.

²³Ugule choona, ndipo usachigulitse. Ugulenso nzeru, mwambo ndiponso mtima womvetsa zinthu.

²⁴Bambo wa mwana waulemu adzakondwa kwambiri. Wobala mwana wanzeru adzasangalala naye.

²⁵Atate ako ndi amai ako asangalale, mai amene adakubala iwe akondwe.

²⁶Mwana wanga, mtima wako ukhulupirire ine, maso ako apenyetsetse njira zanga.

²⁷Mkazi wadama ali ngati dzenje lakuya, mkazi wachiwerewere ali ngati chitsime chophaphatiza.

²⁸Amabisalira ngati mbala yachifwamba, ndipo chifukwa cha iyeyo amuna ambiri amasanduka osakhulupirika.

²⁹Ndani ali ndi tsoka? Ndani ali ndi chisoni? Ndani ali pa mkangano? Ndani akudandaula? Ndani ali ndi zilonda zosadziŵika magwero ake? Ndani ali wofiira maso?

³⁰Ndi amene amakhalitsa pamene pali vinyo, amene amamwa nawo vinyo wosanganiza ndi zina.

³¹Usatengeke mtima ndi kufiira kwa vinyo, pamene akututuma m'chikho namakoma poloŵa ku m'mero.

³²Potsiriza pake amaluma ngati njoka, ndipo amanjenjedula ngati mphiri.

³³Maso ako adzaona zinthu zachilendo, maganizo ndi mau ako adzakhala okhotakhota.

³⁴Udzakhala ngati munthu amene ali gone pakati pa nyanja, kapena ngati munthu wogona pa nsonga ya mlongoti wa ngalaŵa.

³⁵Iwe udzati, “Adanditchaya, koma sadandipweteke. Adandimenya, koma ine osamvako. Kodi ine ndidzatsitsimuka liti? Ndiye ndithamangira chakumwa china.”