Read Buku Loyera - Chichewa Miy. 24 Bible Online

Miy. 24 - Buku Loyera - Chichewa bible

Miy. 24

¹Usamachitira nsanje anthu ochimwa, kapena kumalakalaka kuti uzimvana nawo,

²chifukwa mitima yao imalingalira zandeu, ndipo pakamwa pao pamalankhula zoutsa mavuto.

³Nyumba imamangidwa ndi anthu anzeru, ndipo imakhazikika ndi anthu a mtima wodziŵa zinthu.

⁴Wodziŵa zinthu angathe kudzaza zipinda zake ndi chuma chokondweretsa ndi cha mtengo wapatali.

⁵Munthu wanzeru ndi wamphamvu kupambana munthu wa nyonga zambiri, munthu wophunzira amaposa munthu wamphamvu.

⁶Pafunika malangizo abwino kuti ukamenye nkhondo. Aphungu akachuluka, kupambana kuli pomwepo.

⁷Nzeru ndi yapatali kwambiri kwa munthu wopusa, alibe chonena pa bwalo lamilandu.

⁸Amene amakonzekera kuchita choipa, adzatchedwa mvundulamadzi.

⁹Kukonzekera zopusa nkuchimwa, munthu wonyoza amanyansa anthu.

¹⁰Ukataya mtima pamene upeza zovuta, ndiye kuti mphamvu zako ndi zochepa.

¹¹Uŵapulumutse amene akutengedwa kuti akaphedwe. Uŵalanditse amene akuyenda movutikira popita kukaŵapha.

¹²Ukanena kuti, “Ife sitidazidziŵe zimenezi,” kodi iye amene amayesa mtima, zimenezi saziwona? Kodi amene amayang'anira moyo wako sazidziŵa? Kodi sadzambwezera munthu potsata ntchito zake?

¹³Mwana wanga, uzidya uchi poti ndi wabwino, madzi a m'chisa cha njuchi ndi ozuna ukaŵalaŵa.

¹⁴Udziŵe kuti nzeru ndi yoteronso mumtima mwako. Ukaipeza, zinthu zidzakuyendera bwino m'tsogolo, ndipo chikhulupiriro chako sichidzakhala chachabe.

¹⁵Nyumba ya munthu wabwino usaichite zachifwamba ngati munthu woipa mtima, usachite nayo nkhondo nyumba yake.

¹⁶Munthu wabwino amagwa kasanunkaŵiri, koma amadzukirira ndithu, m'menemo anthu oipa tsoka limaŵagwera chonse.

¹⁷Usamakondwerera kugwa kwa mdani wako, mtima wako usamasangalala iyeyo akaphunthwa.

¹⁸Ukatero Chauta adzaziwona zimenezo nadzaipidwa nazo, kenaka adzaleka kumkwiyira mdani wakoyo.

¹⁹Usamavutika chifukwa cha anthu ochita zoipa, usachite nawo nsanje anthu oipa.

²⁰Pajatu munthu woipa zinthu sizidzamuyendera bwino m'tsogolo, moyo wa anthu oipa adzauzima ngati nyale.

²¹Mwana wanga, uziwopa Chauta ndiponso mfumu, usagwirizane ndi anthu okonda kuŵachitira mwano.

²²Ameneŵa amatha kugwetsa tsoka mwadzidzidzi, ndani angadziŵe kuwopsa kwa chiwonongeko chochokera kwa aŵiriŵa?

²³Enanso ndi aŵa malangizo a anthu anzeru: Kukondera pozenga milandu si chinthu chabwino.

²⁴Amene amauza munthu woipa kuti, “Ndiwe wosalakwa,” anthu adzamtemberera, ndipo mitundu ya anthu idzaipidwa naye.

²⁵Koma aweruzi amene amalanga anthu oipa adzapeza bwino, ndipo adzakhala ndi madalitso ambiri.

²⁶Munthu woyankha zoona ndiye amaonetsa chibwenzi chenicheni.

²⁷Ukonzeretu ntchito zako zonse makamaka zakumunda, pambuyo pake mpamene ungayambe kumanga nyumba.

²⁸Usakhale mboni yotsutsa mnzako popanda chifukwa, pakamwa pako pasamanena zonama.

²⁹Usamanena kuti, “Ndidzamchitira monga momwe iye wandichitira ine, ndidzamlipsira chifukwa cha zomwe iye wandichitira ine.”

³⁰Ndinkayenda m'mbali mwa munda wa munthu waulesi, m'mbali mwa munda wamphesa wa munthu wopanda nzeru.

³¹M'minda monsemo munali mutamera minga yokhayokha, m'nthaka imeneyo munali mutamera khwisa, ndipo mpanda wake wamiyala unali utagwa.

³²Tsono nditaona, ndidayamba kuganizirapo pa zimenezo, nditayang'ana, ndidatolapo phunziro ili:

³³ Ukati, “Taimani ndigoneko pang'ono,” kapena “Ndiwodzereko chabe,” kapena “Ndingopumulako pang'ono,”

³⁴umphaŵi udzakufikira monga mbala, kusauka kudzakupeza ngati mbala yachifwamba.