Read Buku Loyera - Chichewa Miy. 25 Bible Online

Miy. 25 - Buku Loyera - Chichewa bible

Miy. 25

¹Enanso ndi aŵa malangizo a Solomoni amene anthu a Hezekiya, mfumu ya ku Yuda adaŵalemba:

²Ulemerero wa Mulungu wagona pa kubisa zinthu, m'menemo ulemerero wa mafumu wagona pa kuzifufuza zinthuzo.

³Monga momwe uliri mlengalenga kutalika, ndi momwe liliri dziko lapansi kuzama, ndi m'mene aliri maganizo a mfumu kusadziŵika kwake.

⁴Chotsa zoipa m'siliva, ndipo wosula adzatha kupanga naye chiŵiya.

⁵Muchotse aphungu oipa pamaso pa mfumu, ndipo ufumu wake udzakhazikika pa chilungamo.

⁶ Usamadzikuza ukakhala pamaso pa mfumu, usamakhala pa malo a anthu apamwamba.

⁷Pajatu kuli bwino kuchita kukuuza kuti, “Dzakhale pokwera pano”, koposa kuchita kukutsitsa chifukwa cha wina wokupambana. Zimene maso ako azipenya,

⁸usafulumire kupita nazo ku bwalo lamilandu, chifukwa udzatani nanga pambuyo pake, ngati mnzako akuchititsa manyazi pokutsutsa?

⁹Mnzako uzichita kukamba naye zinthu, ndipo usaulule chinsinsi cha wina,

¹⁰kuwopa kuti wina akamva mau ako, angakuchititse manyazi, ndipo mbiri yako yoipa sidzatha.

¹¹Mau amodzi olankhula moyenera ali ngati zokongoletsera zagolide m'choikamo chasiliva.

¹²Kwa munthu womvetsera bwino, kudzudzula kuli ngati mphete yagolide, kapena chokongoletsera china chagolide.

¹³Kwa anthu amene amtuma, wamthenga wokhulupirika ali ngati madzi ozizira pa nthaŵi yotentha, amaziziritsa mtima wa mbuyake.

¹⁴Munthu wonyadira mphatso imene saipereka, ali ngati mitambo ndi mphepo zopanda mvula.

¹⁵Kupirira ndiye kumagonjetsa wolamula, ndipo kufeŵa m'kamwa kumafatsitsa mtima wouma.

¹⁶Ukapeza uchi, ingodya wokukwanira, kuwopa kuti ungakoledwe nawo nkuyamba kusanza.

¹⁷Kunyumba kwa mnzako uzipitako kamodzikamodzi, kuwopa kuti angatope nawe, nkuyamba kudana nawe.

¹⁸Munthu wochitira mnzake umboni wonama, amapweteka mnzakeyo ngati chibonga kapena lupanga kapena muvi wakuthwa.

¹⁹Kukhulupirira munthu wosakhulupirika pa nthaŵi yamavuto kuli ngati kudya ndi dzino loŵaŵa, kapena kuyenda ndi mwendo wothyoka.

²⁰Kuimbira nyimbo munthu wachisoni kuli ngati kumvula zovala pa nyengo yachisanu, ndiponso ngati kumthira vinyo wosasa pa chilonda.

²¹ Mdani wako akakhala ndi njala, umpatse chakudya, akamva ludzu, umpatse madzi akumwa.

²²Potero udzamchititsa manyazi aakulu, ndipo Chauta adzakupatsa mphotho.

²³Mphepo ya mpoto ndiyo imadza ndi mvula, chonchonso mjedu umadzetsa mkwiyo.

²⁴Kuli bwino kukhala potero pa denga, kupambana kukhala m'nyumba pamodzi ndi mkazi wolongolola.

²⁵Mthenga wabwino wochokera ku dziko lakutali uli ngati madzi ozizira kwa munthu waludzu.

²⁶Munthu wabwino amene amagonjera munthu woipa amafanafana ndi kasupe wodzaza ndi matope kapena chitsime cha madzi oipa.

²⁷Si kwabwino kudya uchi wambiri, tsono muchenjere nawo mau oyamikira.

²⁸Munthu wosadzimanga mtima ali ngati mzinda umene adani authyola nkuusiya wopanda malinga.