Read Buku Loyera - Chichewa Miy. 26 Bible Online

Miy. 26 - Buku Loyera - Chichewa bible

Miy. 26

¹Ulemu woulandira chitsiru uli ngati chisanu chambee chomagwa nthaŵi yachilimwe, kapena mvula yomagwa nthaŵi yokolola.

²Monga imachitira mpheta yokhalira kuuluka, monga amachitira namzeze kumangoti zwezwezwe, ndimonso limachitira temberero lopanda chifukwa, silitha.

³Mkwapulo ndi wokwapulira kavalo, chitsulo ncha m'kamwa mwa bulu, chonchonso ndodo ndi yoyenerera zitsiru.

⁴Chitsiru usamachiyankha potsata uchitsiru wake, kuwopa kuti ungafanefane nacho.

⁵Koma mwina uzichiyankha chitsiru potsata uchitsiru wake, kuwopa kuti chingamadziyese chanzeru.

⁶Amene amatuma chitsiru kukanena uthenga, amachita ngati kudzidula mapazi ndipo amadziitanira mavuto.

⁷Monga miyendo ya munthu wopunduka imakhala yopanda ntchito, ndimonso umakhalira mwambi m'kamwa mwa zitsiru.

⁸Amene amachitira chitsiru ulemu ali ngati munthu wokulunga mwala m'khwenengwe.

⁹Monga imachitira minga yobaya dzanja la chidakwa ndimonso umakhalira mwambi m'kamwa mwa zitsiru.

¹⁰Amene amalemba ntchito chitsiru chongodziyendera kapena chidakwa, ali ngati munthu woponya mivi amene amangolasa anthu chilaselase.

¹¹ Chitsiru chimene chimabwerezabwereza za uchitsiru wake chili ngati galu wodya masanzi ake omwe.

¹²Ngakhale chitsiru chomwe nkuti ndiponi, pali chikhulupiriro, koma osati munthu wodziyesa wanzeru pamene ali wopusa.

¹³Waulesi amati, “Pali mkango pa njira! Mumseumo muli mkango!”

¹⁴Monga chitseko chimatembenukira uku ndi uku pa zomangira zake, ndimonso waulesi amangokunkhulira pabedi pake.

¹⁵Waulesi amati akapisa dzanja lake m'mbale, kumamtopetsa kuti alifikitse kukamwa kwake.

¹⁶Waulesi amadziyesa wanzeru kupambana anthu asanu ndi aŵiri amene angathe kuyankha mochenjera.

¹⁷Amene angoloŵerera ndeu ya eniake, ali ngati munthu wombwandira galu wongodziyendera.

¹⁸Monga munthu wopenga amene amangoponya nsakali zamoto, kapena mivi yoopsa,

¹⁹ndimonso amakhalira munthu wonyenga mnzake, amene amati, “Ai, ndi zoseka chabe!”

²⁰Moto umazima pakasoŵa nkhuni, chonchonso kumene kulibe kazitape, kulibenso ndeu.

²¹Monga momwe aliri makala pa moto wonyeka ndiponso nkhuni pa moto woyaka, ndimonso amakhalira munthu wandeu poutsa mikangano.

²²Mau a kazitape ali ngati zakudya zokoma, zimene zimatsikira m'mimba msanga.

²³Monga m'mene chiziro chimakutira chiŵiya chadothi, ndimonso mau oshashalika amabisira mtima woipa.

²⁴Munthu wachidani pakamwa pake pamalankhula zabwino, pamene mumtima mwake muli zonyenga.

²⁵Woteroyo akamalankhula mokometsa mau, usamkhulupirire, pakuti mumtima mwake mwadzaza zoipa.

²⁶Ngakhale amabisa chidani mochenjera, kuipa kwakeko kudzaoneka poyera pakati pa anthu.

²⁷ Amene amakumba dzenje adzagwamo yekha, amene amakunkhuniza mwala, udzampsinja iye yemweyo.

²⁸Munthu wonama amadana ndi amene iye adaŵapweteka, pakamwa poshashalika mpoononga.