Read Buku Loyera - Chichewa Miy. 27 Bible Online

Miy. 27 - Buku Loyera - Chichewa bible

Miy. 27

¹ Usamanyadira zamaŵa, pakuti sudziŵa zimene zidzachitika pa tsikulo.

²Akutame ndi wina, osati pakamwa pako pomwe, wosadziŵana naye akakutamanda, apo ndipo.

³Mwala ndi wolemera, ndipo mchenganso ndi wolemera kwambiri, koma makani a chitsiru ndi oposa zonsezo kulemera kwake.

⁴Mkwiyo umadzetsa nkhanza, kupsa mtima kumachititsa zoopsa, koma nsanje imabweretsa zoipa zopambana.

⁵Kudzudzula munthu poyera nkwabwino kupambana kubisa chikondi chimene uli nacho.

⁶Amene amakukonda, ngakhale akupweteke, chikondi chake chimakhalapobe, mdani wako ngakhale akumpsompsone, nkunyenga chabe kumeneko.

⁷Wokhuta amaipidwa ndi chisa cha uchi, koma kwa munthu wanjala ndi zoŵaŵa zomwe zimatsekemera.

⁸Munthu amene wasokera kutali ndi kwao, ali ngati mbalame yosokera kutali ndi chisa chake.

⁹Mafuta ndi zonunkhira zimasangalatsa mtima, koma kukoma kwa bwenzi kwagona pa malangizo ake.

¹⁰Usasiye bwenzi lako ndiponso bwenzi la atate ako. Usachite kupita ku nyumba ya mbale wake, ukakhala pa mavuto. Mnzako wokhala naye pafupi amaposa mbale wako wokhala kutali.

¹¹Mwana wanga, ukhale ndi nzeru, ukondwetse mtima wanga, kuti choncho ndithe kumuyankha amene amandinyoza.

¹²Munthu wochenjera akaona choopsa amabisala, koma wopusa amangopitirira ndipo amanong'oneza bondo.

¹³Munthu amene waperekera mlendo chikole, umlande chovala chake, chimenecho chikhale chigwiriro chako, chifukwa chakuti waperekera chikole mlendo wosadziŵika.

¹⁴Wopatsa mnzake moni mofuula m'mamaŵa kwambiri, adzamuyesa kuti akutemberera.

¹⁵Mkazi wolongolola ndi wotopetsa ngati mvula ya mvumbi.

¹⁶Kuyesa kumletsa mkazi woteroyo kuli ngati kuyesa kuletsa mphepo, kapena kuyesa kufumbata mafuta m'manja.

¹⁷Chitsulo amachinola nchitsulo chinzake, chonchonso munthu amasulidwa ndi munthu mnzake.

¹⁸Amene amasamalira mkuyu adzadya zipatso zake, chonchonso amene amasamalira mbuyake adzalandira ulemu.

¹⁹Monga momwe nkhope imaonekera m'madzi, momwemonso mtima wa munthu umadziŵika ndi zochita zake.

²⁰Manda sakhuta, nawonso maso a munthu sakhuta.

²¹Siliva amasungunulira mu uvuni, golide amasungunulira m'ng'anjo, chonchonso munthu amayesedwa ndi mbiri yake.

²²Chitsiru ngakhale uchisinje mu mtondo ndi munsi pamodzi ndi chimanga, kupusa kwake sikudzachoka konse.

²³Uzidziŵe bwino nkhosa zako m'mene ziliri, ndipo usamalire ziŵeto zako.

²⁴Paja chuma sichikhala mpaka muyaya. Kodi ufumu umakafika mpaka ku mibadwo yonse?

²⁵Udzu ukatha, msipu nkuphuka, ndipo atatuta udzu wakumapiri,

²⁶anaankhosa adzakupatsa chovala, ndi ubweya wao, ndipo pogulitsa mbuzi udzapeza chogulira munda.

²⁷Udzakhala ndi mkaka wambiri wa mbuzi kuti uzidya, iweyo ndi banja lako, ndiponso ndi adzakazi ako omwe.