Read Buku Loyera - Chichewa Miy. 28 Bible Online

Miy. 28 - Buku Loyera - Chichewa bible

Miy. 28

¹Woipa mtima amangodzithaŵira popanda wina wompirikitsa, koma wochita zabwino amalimba mtima ngati mkango.

²Eni dziko akachita zaupandu, oŵalamulira amachuluka. Koma anthu akakhala omvetsa ndi odziŵa zinthu, dzikolo limakhazikika nthaŵi yaitali.

³Munthu wosauka amene amapondereza osauka anzake, ali ngati mvula yamkuntho yosasiya konse chakudya m'minda.

⁴Amene samvera malamulo amatamanda anthu oipa mtima, koma otsata malamulo amatsutsana nawo.

⁵Anthu oipa samvetsa kuti chilungamo nchiyani, koma amene amatsata kufuna kwa Chauta amachimvetsa kwathunthu.

⁶Munthu wosauka amene amayenda mwaungwiro amaposa kwambiri munthu wolemera amene ali wonyenga.

⁷Amene amatsata malamulo ndiye mwana wanzeru, koma amene amayenda ndi anthu adyera, amachititsa atate ake manyazi.

⁸Amene amachulukitsa chuma chake polandira chiwongoladzanja ndi pochikundika, chumacho amachikundikira ena amene adzachitira chifundo anthu osauka.

⁹Wina akamakana kumvera malamulo, ngakhale mapemphero ake amanyansira Mulungu.

¹⁰Amene amasokeza anthu olungama kuti azitsata njira yoipa, adzagwa m'dzenje lake lomwe. Koma anthu amene alibe cholakwa adzalandira choloŵa chabwino.

¹¹Munthu wolemera amadziyesa wanzeru, koma munthu wosauka amene ali womvetsa zinthu, amamtulukira.

¹²Anthu abwino akapambana, pamakhala chikondwerero chachikulu, koma oipa mtima akalandira ulamuliro, anthu amabisala.

¹³Wobisa machimo ake sadzaona mwai, koma woulula ndi kuleka machimo, adzalandira chifundo.

¹⁴Ndi wodala munthu amene amaopa Chauta nthaŵi zonse, koma woumitsa mtima wake adzagwa m'tsoka.

¹⁵Monga muja umakhalira mkango wobangula kapena chimbalangondo cholusa, ndimonso imakhalira mfumu yoipa mtima kwa anthu osauka.

¹⁶Wolamulira amene samvetsa zinthu amapondereza anthu mwankhanza, koma wodana ndi phindu loipa amatalikitsa masiku ake.

¹⁷Munthu amene wapalamula mlandu wopha mnzake, akhale womathaŵathaŵa mpaka kufa kwake. Wina aliyense asamthandize.

¹⁸Amene amayenda mokhulupirika adzapulumutsidwa, koma woyenda mokhotakhota adzagwa m'dzenje.

¹⁹Wolima m'munda mwake adzakhala ndi chakudya chambiri, koma wonka nafuna zopanda pake adzasauka kwambiri.

²⁰Munthu wokhulupirika adzakhala ndi madalitso ambiri, koma wofunitsitsa kulemera msanga sadzalephera kupeza chilango.

²¹Kuchita tsankho si kwabwino, komabe ena amaweruza mokondera chifukwa cha kachidutswa ka buledi.

²²Munthu wakaliwumira amafunitsitsa kulemera mofulumira, koma sadziŵa kuti umphaŵi udzamgwera.

²³Amene amadzudzula mnzake, potsiriza pake mnzakeyo adzamkonda kwambiri kupambana amene ali ndi mau oshashalika.

²⁴Wobera atate ake kapena amai ake namanena kuti kutero sikulakwa, ameneyo ndi mnzake wa munthu woononga.

²⁵Munthu waumbombo amautsa mkangano, koma wokhulupirira Chauta adzalemera.

²⁶Samvazaanzake nchitsiru, koma wotsata nzeru za ena adzapulumuka.

²⁷Amene amapatsa osauka sadzasoŵa kanthu koma amene amatsinzina dala kuti asaŵapenye, adzatembereredwa kwambiri.

²⁸Anthu oipa mtima akalandira ulamuliro, anthu amabisala, koma oipawo akaonongeka, anthu ochita chilungamo amapeza bwino.