Read Buku Loyera - Chichewa Miy. 29 Bible Online

Miy. 29 - Buku Loyera - Chichewa bible

Miy. 29

¹Munthu wochita liwuma kwina atamdzudzula, adzaonongeka mwadzidzidzi osachiranso.

²Mu dziko mukakhala chilungamo, anthu amakondwa, koma chilungamo chikasoŵa, anthu amadandaula.

³Wokonda nzeru amasangalatsa atate ake, koma amene amayenda ndi akazi adama amamwaza chuma chake.

⁴Mfumu imalimbitsa dziko pakuweruza molungama, koma imene imaumiriza anthu kuti aipatse ziphuphu, imaononga dziko.

⁵Munthu amene amathyasika mnzake amadzitchera msampha yekha.

⁶Munthu woipa amakodwa ndi zolakwa zake, koma wochita chilungamo amakhala wokondwa ndi womasuka.

⁷Munthu wokoma mtima amasamalira zoyenerera osauka, koma munthu woipa salabadako za zimenezo.

⁸Anthu onyoza akhoza kuyatsa mzinda, koma anthu anzeru amabweza ukali.

⁹Munthu wanzeru atatsutsana ndi chitsiru, chitsirucho chimangochita phokoso nkumaseka, ndipo sipakhala mtendere.

¹⁰Anthu okhetsa magazi amadana ndi munthu wosalakwa, koma anthu angwiro amateteza moyo wake.

¹¹Wopusa amaonetsa mkwiyo wake, koma munthu wanzeru amadzigwira.

¹²Wolamula akamamvera zabodza, nduna zake zonse zidzakhala zoipa.

¹³Munthu wosauka ndi munthu wopondereza anzake amafanafana pa ichi, chakuti onsewo Chauta ndiye adaŵapatsa maso.

¹⁴Mfumu ikamaweruza osauka mosakondera, ufumu wake udzakhazikika mpaka muyaya.

¹⁵Mkwapulo ndi chidzudzulo zimapatsa nzeru, koma mwana womamlekerera amachititsa amake manyazi.

¹⁶Oipa akamalamulira, zolakwa zimachuluka, koma ochita chilungamo adzaona kugwa kwa oipawo.

¹⁷Uzimlanga mwana wako ndipo adzakupatsa mtendere mu mtima, adzakondweretsa mtima wako m'tsogolo.

¹⁸Kumene kulibe mithenga yochokera kwa Mulungu, anthu saweruzika, ndi wodala munthu amene amatsata malamulo.

¹⁹ Munthu wotumikira samulanga ndi mau chabe, ngakhale aŵamvetse mauwo, sadzasamalako.

²⁰Ngakhale chitsiru chomwe nkuti ndiponi pali chikhulupiriro, koma osati munthu wodziyesa wanzeru pamene ali wopusa.

²¹Amene amasasatitsa kapolo wake kuyambira ali mwana, pomaliza pake adzapeza kuti kapoloyo wasanduka mloŵachuma wake.

²²Munthu wamangaŵa amautsa mikangano, munthu wokalipakalipa amabweretsa zolakwa zambiri.

²³Kunyada kwa munthu kudzamtsitsa, koma amene ali wodzichepetsa adzalandira ulemu.

²⁴Woyenda ndi mbala ndi wodana ndi moyo wake, amamva kutemberera, koma osaulula kanthu.

²⁵Kuwopa anthu kuli ngati msampha, koma wodalira Chauta amakhala pabwino.

²⁶Ambiri amafunitsitsa kuti wolamulira aŵakomere mtima, koma munthu amamuweruza molungama ndi Chauta yekha.

²⁷Anthu osoŵa chilungamo amanyansa anthu ochita chilungamo, monga momwe anthu abwino amanyansira anthu oipa mtima.